វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 362 នាក់
ម្សិលមិញ 6359 នាក់
សរុប 14086995 នាក់
កំពង់ស្ពឺ៖ នៅថ្ងៃទី១ ខែមិថុនា ឆ្នាំ២០២១ ដែលជាថ្ងៃប្រារព្ធទិវាកុមារអន្តរជាតិព្រះករុណា ព្រះបាទនរោត្តម សីហ មុនី ព្រះមហាក្សត្រនៃព្រះរាជាណាចក្រកម្ពុជា តាមរយៈសម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំងបានព្រះរាជទាននូវព្រះរាជអំណោយដល់កុមារកំព្រាជាង ១០០នាក់ ដែលកំពុងស្នាក់នៅក្នុងអង្គការបណ្តុះបណ្តាល ថែរក្សាកុមារកំព្រា ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺខេត្តកំពង់ស្ពឺ ។
សម្តេចចៅហ្វាវាំង គង់ សំអុល បាននាំនូវព្រះរាជបន្ទូលផ្តាំផ្ញើសាកសួរសុខទុក្ខដល់ លោកគ្រូ អ្នកគ្រូ ថ្នាក់ដឹកនាំមណ្ឌល និងកូនចៅ ចៅទួត ពីព្រះករុណា ព្រះបាទសម្តេចនរោត្តម សីហ មុនី ព្រះមហាក្សត្រនៃព្រះរាជាណាចក្រកម្ពុជា ដែលជានិច្ចកាលព្រះអង្គតែងតែព្រះរាជតំរិះគិតគូរដល់សុខទុក្ខកូនចៅ ចៅទួតរបស់ព្រះអង្គ។
ព្រះរាជអំណោយដែលបានប្រគល់ និងចែកជូននេះមាន អង្ករ ១០តោន សម្រាប់ពីរមណ្ឌល លោកគ្រូ អ្នកគ្រូ ៣០នាក់ ទទួលបានថវិកាម្នាក់ ១០ម៉ឺនរៀល ឃីតមួយកញ្ចប់ និងអាវយឺតមួយ ម៉ាស១០បន្ទះ។ ចំណែកក្មេងៗដែលជាកូនចៅ ចៅទួតចំនួន ១១៣នាក់(ស្រី ៤៥នាក់)ទទួលបានព្រះរាជអំណោយក្នុងម្នាក់ អាវយឺតមួយ ម៉ាស១០បន្ទះ ខោអាវមួយសម្រាប់ សំពត់ ខោខៀវអាវស សៀវភៅ ប៊ិច កាបូប និងឃីតម្នាក់មួយ ផងដែរ។
សូមបញ្ជាក់ថា ក្នុងពេលសំណេះសំណាលនាឱកាសនោះដែរ សម្តេចចៅហ្វាវាំងក៏បានផ្តាំផ្ញើដល់ថ្នាក់ដឹកនាំ លោកគ្រូ អ្នកគ្រូ និងកូនចៅ ចៅទួត ឱ្យខិតខំថែរក្សាសុខភាពឱ្យបានល្អ ចូលរួមអនុវត្តវិធានការការពារដែលក្រសួងសុខាភិបាលបានដាក់ចេញ និងវិធានការ ៣កុំ ៣ការពារ ដើម្បីគេចផុតពីការឆ្លងជំងឺកូវីដ-១៩។ មួយវិញទៀតកូនចៅ ចៅទួត ត្រូវបន្តខិតខំរៀនសូត្រ ដើម្បីកសាងអនាគតឱ្យបានល្អ ឱ្យក្លាយជាសសរទ្រូងដ៏រឹងម៉ាំរបស់ប្រទេសជាតិនាពេលអនាគត៕