សម្តេចតេជោពន្យល់ពីការកែប្រែថវិការឧបត្ថម្ភប្រជាពលរដ្ឋកូវីតទៅជាគ្រឿងឧបភោគបរិភោគនិងសុំយោគយល់
25-December-2024 / សេដ្ឋកិច្ច
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅល្ងាចថ្ងៃទី ២០ ខែមេសា ឆ្នាំ២០២១នេះ បានបញ្ជាក់ពីការកែប្រែគោលនយោបាយឧបត្ថម្ភប្រជាពលរដ្ឋដែលរងគ្រោះដោយសារកូវីតថា «កន្លងទៅ ខ្ញុំបានប្រកាសអំពីគោលនយោបាយសម្រាប់ជួយឧបត្ថម្ភបងប្អូនដែលមរណភាពដោយសារ covid-19 អ្នកកើតកូវីដ ១៩ អ្នកចត្តាឡីស័កដោយសារ covid-19 ប៉ុន្តែបន្ទាប់ពីបិទកន្លែងតូចៗមួយចំនួនក្នុងរាជធានីភ្នំពេញ តែយើងបែរជាបិទរាជធានីភ្នំពេញទាំងមូល និងក្រុងតាខ្មៅខេត្តកណ្ដាល»។
សម្ដេចតេជោ ហ៊ុន សែនតាមរយៈសារជាសម្លេង បានបន្តថា «ដូច្នេះការអាក់ខានផ្ដល់ថវិកាចំនួន ៣០ម៉ឺនរៀលដែលមិនអាចធ្វើទៅកើតទេ»។
សម្ដេចតេជោ នាយករដ្ឋមន្ត្រី បានបញ្ជាក់ថា «បើទោះបីជាមិនបានផ្ដល់ជូននូវថវិកាចំនួន ៣០ម៉ឺនរៀល ក៏ប៉ុន្តែខ្ញុំបានប្ដូរទៅជាការផ្ដល់ត្រឡប់ទៅវិញតាមរយៈការផ្គត់ផ្គង់ជា អង្ករ ត្រីខ មី ទឹកត្រី ទឹកស៊ីអ៊ីវ និងអ្វីៗតាមលទ្ធភាពដែលអាចធ្វើទៅបាន»។
សម្ដេចតេជោ ហ៊ុន សែន បានមានប្រសាសន៍បន្តថា « ថ្ងៃនេះមានបងប្អូនប្រជាពលរដ្ឋ បានបង្ហោះនៅក្នុងបណ្ដាញសង្គម ក៏ដូចជាតវ៉ាជាមួយនឹងអ្នកចែកជំនួយ ដូច្នេះខ្ញុំសូមឱ្យបងប្អូនមេត្តាអធ្យាស្រ័យចំពោះការលំបាករបស់រាជរដ្ឋាភិបាលដែលមិនអាចផ្ដល់ប្រាក់ ៣០ម៉ឺនរៀលក្នុងមួយគ្រួសារ ឬមួយនាក់ ជូនបងប្អូនបានទៅទៀតទេ។ ប៉ុន្តែយើងជំនួសវិញ មិនឱ្យបងប្អូនដាច់បាយតាមរយៈការផ្ដល់ជំនួយអង្ករ និងសម្ភារផ្សេងៗ»។សម្ដេចតេជោ ហ៊ុន សែន ក៏បានសូមឱ្យបងប្អូនប្រជាពលរដ្ឋមេត្តាយោគយល់ ៣០ម៉ឺនរៀល មិនធំទេសម្រាប់បងប្អូន ក៏ប៉ុន្តែជាបន្ទុករបស់រាជរដ្ឋាភិបាលដែលផ្គត់ផ្គង់ទូទាំងរាជធានីភ្នំពេញ ព្រោះត្រូវជាប់ធ្វើចត្តាឡីស័ក និងជាប់នូវបម្រាមដូចគ្នា។
សម្ដេចតេជោ ហ៊ុន សែន បានមានប្រសាសន៍បន្តថា «ខ្ញុំបានទទួលព័ត៌មាន ដោយមានបងប្អូនមួយចំនួនមិនទទួលយកនូវជំនួយ ប្រសិនបើមានបងប្អូនបដិសេធមិនទទួលយកជំនួយ សូមអ្នកដែលផ្ដល់ជំនួយដកថយពីតំបន់នោះ ទៅចែកជូនបងប្អូននៅតំបន់ផ្សេងដែលគេត្រូវការ។ ដោយយើងមិនអាចប្រកែក និងពន្យល់បងប្អូនយើងបានទេចំពោះបងប្អូនដែលបដិសេធមិនទទួលយកជំនួយ ខណៈដែលបងប្អូនមិនទទួលយកការពន្យល់»។សម្ដេចតេជោ ហ៊ុន សែន ក៏បានបញ្ជាក់ជូនប្រជាពលរដ្ឋឲ្យបានជ្រាបថា ប្រសិនបើត្រឹមមួយម៉ឺនឬពីរម៉ឺន មិនមែនជាការលំបាកទេ។ ប៉ុន្តែនាពេលបច្ចុប្បន្ននេះ មានរាប់សិបម៉ឺនគ្រួសារ ហើយប្រសិនបើបងប្អូនទាមទារម្នាក់ឲ្យខានតែបាន រដ្ឋជួបការលំបាកក្នុងការដោះស្រាយ ។
សម្ដេចបានមានប្រសាសន៍បន្តថា កន្លងទៅយើងបានផ្ដល់ជូនប្រជាពលរដ្ឋបានប្រមាណ ១ ម៉ឺនគ្រួសារ ហើយសម្រាប់នៅថ្ងៃស្អែកទី២១មេសានេះ នឹងមានចំនួនជិតមួយម៉ឺនគ្រួសារទៀត ខានស្អែកប្រមាណជិត ២ម៉ឺនគ្រួសារទៀត ដែលរដ្ឋផ្តល់ជូនជំនួយ។សម្ដេចតេជោ ហ៊ុន សែន បានថ្លែងនូវការអង្វរករសម្រាប់បងប្អូនដែលបាត់បង់ប្រាក់កាសចំនួន ៣០ម៉ឺនរៀល សូមបងប្អូនយោគយល់ចំពោះការលំបាករួមរបស់យើង.។
សូមបញ្ជាក់ថាថ្មីៗនេះសាលារាជធានីបានកំណត់តំបន់មួយចំនួនជាតំបន់ក្រហមដែលមានហានិភ័យពីការចម្លងជម្ងឺកូវីតខ្ពស់។ តំបន់ក្រហមនេះអ្នកដែលមិនគោរពតាមបម្រាមវិញ អាជ្ញាធររាធានីភ្នំពេញនឹងឃាត់ទុកមធ្យោបាយធ្វើដំណើរបណ្តោះអាសន្ន និងរងទណ្ឌកម្មរដ្ឋបាលដទៃទៀត។ ចំពោះអ្នកល្មើស គឺអាចប្រឈមនឹងផាកពិន័យជាទឹកប្រាក់ពី១លានរៀលទៅ៥លានរៀល ហើយត្រូវផ្ទន្ទាទោសដាក់ពន្ធនាគារពីចន្លោះពី៦ខែទៅ៣ឆ្នាំ និងពិន័យបន្ថែមទៀតពី២លានរៀលទៅ១០លានរៀល បើសកម្មភាពបំពាននាំឱ្យមានការចម្លងជំងឺកូវីដ១៩ទៅអ្នកដទៃ។ លើសពីនេះទៅទៀត គឺនឹងត្រូវផ្ទន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាទឹកប្រាក់ពី៥លានរៀលទៅ២០លានរៀល បើសកម្មភាពបំពានបណ្តាលឱ្យប៉ះពាល់ធ្ងន់ធ្ងរដល់សុខភាពសាធារណៈ។
សូមបញ្ជាក់ជូនថា នៅក្នុង«តំបន់ក្រហម» ផ្សារ និងទីកន្លែងលក់អាហារ និងគ្រឿងឧបភោគ បរិភោគត្រូវបានបិទក៏ដោយ ក៏ប៉ុន្តែ រដ្ឋាភិបាលកម្ពុជាបានបញ្ជាឱ្យក្រសួងពាណិជ្ជកម្មរៀបចំសម្របសម្រួលឱ្យមានការផ្គត់ផ្គង់ ដឹកជញ្ជូន និងចែកចាយស្បៀង ព្រមទាំងគ្រឿងឧបភោគបរិភោគ ដើម្បីលក់ឱ្យប្រជាពលរដ្ឋដោយអនុវត្តសេវាលក់តាមប្រព័ន្ធទូរស័ព្ទ ឬអនឡាញ និងការដឹកជញ្ជូនដល់មុខផ្ទះ។ រដ្ឋាភិបាលកម្ពុជាក៏បានបញ្ជាឱ្យអាជ្ញាធរអនុវត្តវិធានការបិទខ្ទប់ក្នុង«តំបន់ក្រហម»ចាត់ចែងជាបន្ទាន់នូវជំនួយសង្គ្រោះបន្ទាន់ដល់ប្រជាពលរដ្ឋងាយរងគ្រោះ ក្រីក្រ និងជួបការលំបាកក្នុងជីវភាព៕
