វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4976 នាក់
ម្សិលមិញ 6359 នាក់
សរុប 14091609 នាក់
ភ្នំពេញ៖តាមរយៈសារសំឡេងនៅថ្ងៃទី១៦ ខែមេសាឆ្នាំ ២០២១នេះ សម្ដេចតេជោ ហ៊ុន សែន បានមានប្រសាសន៍ថា «បន្ទាប់ពីមានការបិទខ្ទប់នៅក្នុងរាជធានីភ្នំពេញ និងក្រុងតាខ្មៅ យើងបានសង្កេតឃើញថា ការធ្វើចរាចរណ៍របស់ប្រជាពលរដ្ឋនៅតាមដងផ្លូវនៅតែមាន»។
ដោយសារនៅសង្កេតឃើញមានការធ្វើចរាចរណ៍របស់ប្រជាពលរដ្ឋនៅតាមដងផ្លូវនេះ សម្ដេចតេជោ ហ៊ុន សែន ក៏បានបញ្ជាទៅអាជ្ញាធរមានសមត្ថកិច្ចគ្រប់ជាន់ថ្នាក់ ថា «សម្រាប់ប្រជាពលរដ្ឋរបស់យើង នៅផ្ទះណាត្រូវនៅផ្ទះនោះ នៅភូមិណាត្រូវនៅភូមិនោះ នៅស្រុកណា គឺនៅស្រុកនោះ នៅទីកន្លែងណា គឺនៅទីកន្លែងនោះ ក្នុងរយៈពេល ១៤ថ្ងៃ»។សម្ដេចតេជោ ហ៊ុន សែន បានបញ្ជាក់ថា «ខ្ញុំសូមបញ្ជាក់ថា ការបិទនេះ មិនឲ្យប្រជាជនចេញពីផ្ទះតែម្ដង លើកលែងតែករណីចាំបាច់មួយចំនួន ប៉ុន្តែក៏មិនត្រូវលើកឡើងករណីចាំបាច់លើកលែងនោះ ធ្វើជាលេសដើម្បីការចាកចេញរបស់បងប្អូនដែរ»។
ទាក់ទងនិងករណីយ៍លើកលែងសម្តេចតេជោ ហ៊ុន សែន បញ្ជាក់បន្តថា «ករណីនេះ មានករណីលើកលែងមួយចំនួន ប៉ុន្តែមិនមែនចេះតែលើកលែងនោះទេ។ ដូច្នេះ សូមឱ្យបងប្អូនប្រជាពលរដ្ឋរបស់យើងទ្រាំទ្រនូវការលំបាកក្នុងរយៈពេលដែលប្រទេសជាតិជួបការលំបាក»។សម្ដេចតេជោបានព្រមានទុកថា «ខ្ញុំព្រះករុណាខ្ញុំ សូមបញ្ជាក់ជូនថា ប្រសិនបើ ១៤ថ្ងៃហើយ បងប្អូនយើងនៅតែបំពានហើយសភាពការណ៍មិនថយចុះ ខ្ញុំព្រះករុណាខ្ញុំ នឹងអូសបន្លាយពេលនៃការបិទទីក្រុងភ្នំពេញ និងក្រុងតាខ្មៅបន្តទៀត»។
សម្តេចតេជោ បានបន្តថា «ប្រសិនបើគ្មានការសហការពីសំណាក់ប្រជាពលរដ្ឋទេ យើងលំបាកនឹងទទួលជោគជ័យ ហើយបើគ្មានការអនុវត្តឲ្យបានម៉ឺងម៉ាត់ពីសមត្ថកិច្ច ជាពិសេសនគរបាល និងកងរាជអាវុធហត្ថ និងអាជ្ញាធរគ្រប់ថ្នាក់ទីនោះ នឹងមិនអាចទទួលជោគជ័យនោះទេ»។សម្ដេចតេជោ ហ៊ុន សែន បានសង្កត់ធ្ងន់ដោយបញ្ជាដាច់ណាត់មិនឲ្យប្រជាជនចេញពីក្រុងភ្នំពេញ ហើយក៏មិនអនុញ្ញាតឲ្យមនុស្សទៅស្រុកកំណើត ហើយត្រឡប់មកវិញដើម្បីចូលក្រុងភ្នំពេញទេ។ អ្នកដែលបានទៅលេងស្រុកហើយ ត្រឡប់ចូលមកក្នុងក្រុងភ្នំពេញត្រូវនៅស្រុក ១៤ថ្ងៃ រហូតដល់ក្រុងភ្នំពេញបើកវិញ។
សម្តេចតេជោ ហ៊ុន សែន ក៏បានលើកឡើងមូលហេតុថា ការធ្វើនេះដើម្បីកាត់ផ្ដាច់នូវខ្សែចម្លងកូវីដ១៩ រវាងអ្នកនៅផ្ទះមួយ ទៅផ្ទះមួយ ភូមិមួយទៅភូមិមួយ ឃុំមួយទៅភូមិមួយ នៅក្នុងទីក្រុងភ្នំពេញ ហើយក៏កាត់បន្ថយការចម្លងពីទីក្រុងភ្នំពេញទៅកាន់ខេត្ត ពីខេត្តកាន់ក្រុងភ្នំពេញ។ «មានមនុស្សមួយចំនួនបានចាកចេញពីរាជធានីភ្នំពេញទៅកាន់ខេត្ត ដូចជាខេត្តព្រៃវែង និងខេត្តក្រចេះជាដើម ដោយទៅដល់រកឃើញកូវីដ១៩ នៅខេត្តនោះតែម្ដង »។សម្តេចតេជោ បានបន្តថា ដោយសារស្ថានភាពបែបនេះ ហើយ យើងត្រូវតែរឹតបន្តឹងបន្ថែមទៀត ។
សម្ដេចក៏បានសង្កត់ធ្ងន់ថា ហាមដាច់ខាតការលួចចរាចរណ៍មនុស្សពីក្រុងភ្នំពេញទៅកាន់បណ្ដាខេត្តតាមមធ្យោបាយនានា ដូចជារថយន្តសង្គ្រោះបន្ទាន់ រថយន្តពេទ្យ រថយន្តយោធា រថយន្តនគរបាល ឬក៏រថយន្តអ្នកធំណាមួយ។សម្ដេចតេជោហ៊ុនសែន ក៏បានណែនាំទៅដល់កម្លាំងសមត្ថកិច្ចដែលអនុវត្តច្បាប់សូមឲ្យរក្សានៅគម្លាតសុវត្ថិភាព យកចិត្តទុកដាក់ពេលអនុវត្តន៍ច្បាប់ ជាពិសេសពេលពិនិត្យឯកសារនានាតាមដងផ្លូវ៕