ក្រុមហ៊ុនបូមប្រេងប្លុកអាធើការការងារក្រឡេះខេះក្រសួងឋាមពលឲ្យពន្យល់បើមិនចឹងផាកពិន័យ!
20-March-2025 / សេដ្ឋកិច្ច
ភ្នំពេញ៖ក្រុមហ៊ុនប្រេងកាតក្រីសអែណឺជី(KrisEnergy)ដែលកំពុងធ្វើអាជីវកម្មទាញយកធនធានប្រេងឥន្ទនៈ នៅក្នុងដែនសមុទ្រកម្ពុជា នៃតំបន់អប្សរា ក្នុងប្លុក A បាននិយាយថាការងាររកស៊ីគេជួបហានិភ័យដែលបញ្ហានេះក្រសួងរ៉ែនិងឋាមពលតម្រូវឲ្យក្រុមហ៊ុនបង្ហាញពីរបាយការណ៍ និងហេតុផលច្បាស់លាស់អំពីផលិតកម្មរបស់ខ្លួន បើមិនដូច្នេះទេក្រុមហ៊ុននេះអាចនឹងរងការផាកពិន័យ ឬលុបកិច្ចព្រមព្រៀងរបស់ក្រុមហ៊ុន។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពល បានមានប្រសាសន៍ប្រាប់កាសែតថា ប្រសិនបើក្រុមហ៊ុន KrisEnergy មិនអាចដោះស្រាយស្ថានការណ៍បានទេ នោះរដ្ឋាភិបាលអាចនឹងផាកពិន័យ ឬក៏លុបចោលកិច្ចព្រមព្រៀងរបស់ក្រុមហ៊ុន។ ដូច្នេះរដ្ឋាភិបាលរំពឹងថា នឹងមានការពន្យល់ពីក្រុមហ៊ុនជាលាយលក្ខអក្សរដើម្បីឯកភាពគ្នា នៅចុងខែឧសភានេះ បើពុំដូច្នោះទេ គឺអាចឈានទៅដល់ការប្តឹងផ្តល់គ្នានៅតុលាការ។
សូមបញ្ជាក់ថា៖ក្រុមហ៊ុន KrisEnergy បានចាប់ផ្តើមធ្វើប្រតិបត្តិការទាញយកប្រេងពីអណ្តូងប្រេងទី១ ឈ្មោះ A-0ID នៃផ្លាតហ្វម A នៅក្នុងប្លុកនៃឈូងសមុទ្រកម្ពុជា កាលពីថ្ងៃទី ២៩ខែធ្នូ ឆ្នាំ ២០២០។សារព័ត៌មានជប៉ុន Nikkei នៅថ្ងៃទី៦ ខែមេសា ឆ្នាំ២០២១ បានឲ្យដឹងថា រយៈពេល ០៤ខែ បន្ទាប់ពីក្លាយជាក្រុមហ៊ុនដំបូងគេ ក្នុងការទាញយកប្រេង ក្នុងដែនសមុទ្ររបស់ប្រទេសកម្ពុជា ក្រុមហ៊ុន KrisEnergy ដែលបានចុះបញ្ជីនៅក្នុងប្រទេសសិង្ហបុរី បានលើកឡើងថា ការទាញយកប្រេងរបស់ខ្លួនកំពុងប្រឈមនឹងហានិភ័យ។
ក្រុមហ៊ុនកំពុងរៀបចំរចនាសម្ព័ន្ធឡើងវិញ ក្នុងគោលបំណងកាត់បន្ថយបន្ទុកបំណុលរបស់ខ្លួន ហើយបានវិនិយោគសាច់ប្រាក់ លើគម្រោងនេះនៅប្រទេសកម្ពុជា ដើម្បីផ្តល់មូលនិធិដល់ប្រតិបត្តិការរបស់ខ្លួន។ ក្រុមហ៊ុននេះឱ្យដឹងថា ផ្លេតហ្វមអណ្តូងចំនួន០៥ ដែលត្រូវបានដំឡើងចន្លោះខែធ្នូ និងកុម្ភៈ គឺមិនសូវមានផលិតភាព ដូចការរំពឹងទុកនោះទេ។ ក្រុមហ៊ុនមួយនេះ បានឱ្យដឹងថា ខ្លួនបានធ្វើកិច្ចសន្យាជាមួយក្រុមហ៊ុនប្រឹក្សាយោបល់ ដើម្បីវាយតម្លៃឡើងវិញនូវការស្តារឡើងវិញរបស់តំបន់ប្រេងនេះ ប៉ុន្តែបានទទួលស្គាល់ថា វានឹងមានកម្រិតទាបជាងការព្យាករណ៍។ក្រុមហ៊ុនបានបង្ហាញរបាយការណ៍កាលពីសប្តាហ៍មុនថា ផលិតកម្មប្រេងនៅតំបន់សម្បទានក្នុងដែនសមុទ្រកម្ពុជា ដែលត្រូវបានគេស្គាល់ថា ជាអណ្តូងប្រេងអប្សរា គឺទាបជាងការព្យាករណ៍ ដែលធ្វើឱ្យមានភាពមិនប្រាកដប្រជា នឹងថាតើក្រុមហ៊ុនអាចបញ្ចប់ការរៀបចំរចនាសម្ព័ន្ធទាញយកប្រេង តាមការគ្រោងទុកឬយ៉ាងណា។
សូមបញ្ជាក់ថា ផលិតកម្មប្រេងជាមធ្យម ចន្លោះពីថ្ងៃទី២៣ ខែកុម្ភៈ ដល់ថ្ងៃទី៣០ ខែមីនា ទទួលបានប្រេងជាមធ្យមចំនួន ២៨៨៣បារ៉ែល ក្នុងមួយថ្ងៃ ដែលជាចំនួនទាបជាងការព្យាករណ៍ ដែលអាចផលិតបានខ្ពស់បំផុតចំនួន ៣៥៤៣បារ៉ែល ដែលជាទិសដៅមួយមិនទាន់អាចសម្រេចបានឡើយ។កាលពីដើមខែកុម្ភៈប្រតិភូគណៈកម្មការទី៩ រដ្ឋសភាជាតិដឹកនាំដោយលោកកែបជុតិមាជាអនុប្រធានគណកម្មការបាន វាយតម្លៃខ្ពស់ចំពោះលទ្ធផលការងារបូមប្រេងរបស់ក្រុមហ៊ុន Kris Energy នៅ ប្លុកA ក្នុងដែន សមុទ្រ កម្ពុជា។បានសេចក្តីថាដំណើរការល្អតើម៉េចបានជាមានបញ្ហាទៅវីញ?។
តាមក្រសួងរ៉ែ និងថាមពល បានឲ្យដឹងថា បរិមាណសក្តានុពលធនធានប្រេងកាតដែលត្រូវបានសិក្សារកឃើញ និងរំពឹងទុកគម្រោងប្រេងកាតប្លុក A សម្រាប់ដំណាក់កាលដំបូង 1A និង 1B ត្រូវបានប៉ាន់ស្មានថា អាចមានលើសពី ៣០លានបារ៉ែល ដែលមានរយៈពេលផលិតកម្ម ៩ឆ្នាំ ហើយអាចមានលទ្ធភាពពាណិជ្ជកម្មគ្រប់គ្រាន់ ដើម្បីជំរុញកម្ពុជាឲ្យក្លាយជាប្រទេសផលិតប្រេងឆៅផងដែរនៅពេលអនាគត៕
.jpg&h=97&w=146)
