វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7051 នាក់
ម្សិលមិញ 8227 នាក់
សរុប 14133932 នាក់
ព្រះសីហនុ៖ ប្រភេទថ្នាំញៀន Ketamine ចំនួនប្រមាណជា ៤០០គីឡូក្រាម ត្រូវបានកងទ័ពជើងទឹកនៅការពារកោះពូលូវៃនៃខេត្តព្រះសីហនុបានប្រទះឃើញនៅក្បែរកោះ កាលពីថ្ងៃទី៦ ខែកុម្ភៈ ឆ្នាំ២០២១ ។ថ្នាំញៀនទាំងនោះខាងកងទ័ពបានសន្និដ្ឋានជាជំហានដំបូងថា ទំនងជាមានអ្នកយកទៅផ្លុងចោល។យោធាបានប្រមូលយកទៅប្រគល់ដល់កម្លាំងទីបញ្ជាការជួរមុខ គណៈកម្មាធិការជាតិសន្តិសុខលម្ហសមុទ្រ ដើម្បីអនុវត្តតាមនីតិវិធី។
លោកឧត្តមនាវីឯក ទៀ សុខា មេបញ្ជាការរងកងទព័ជើងទឹក និងជាមេបញ្ជាការទីបញ្ជាការជួរមុខ គណៈកម្មាធិការជាតិសន្តិសុខលម្ហសមុទ្រ បាននាំយកថ្នាំញៀនទាំងនោះទៅទីបញ្ជាការដ្ឋានជួរមុខ គណៈកម្មាធិការជាតិសន្តិសុខលម្ហសមុទ្រ នៅព្រឹកថ្ងៃ៧ ខែកុម្ភៈ ឆ្នាំ២០២១។ ករណីនេះសមត្ថកិច្ចជំនាញពាក់ព័ន្ធកំពុងសហការត្រួតពិនិត្យតាមបច្ចេកទេសនៅឡើយ និងមិនទាន់ស្រាវជ្រាវដឹងពីប្រភព នៅឡើយទេ តែកំពុងបូកសរុបចំនួនពិតប្រាកដដើម្បីស្រាវជ្រាវតាមនិតិវិធី។
របាយការណ៍របស់អង្គភាពប្រឆាំងគ្រឿងញៀន នៃអគ្គស្នងការនគរបាលជាតិបានឲ្យដឹងថានៅក្នុងមួយខែមករា ឆ្នាំ ២០២១ កម្លាំងសមត្ថកិច្ចទូទាំងប្រទេសកម្ពុជា បានបង្ក្រាបករណីគ្រឿងញៀនសរុបចំនួន ៦៩៨ករណី និងឃាត់ខ្លួនមនុស្សចំនួន ១ ៧២២នាក់ រួមទាំងមានការដកហូតថ្នាំញៀនជិត ៧០គីឡូក្រាម និង ៧៨៣កញ្ចប់ រួមនឹងកញ្ឆា ៦ ៤២៧ដើមផង។ កាលពីដើមខែកុម្ភៈរដ្ឋមន្ត្រីក្រសួងមហាផ្ទៃ សម្តេចក្រឡាហោមស ខេង បានបង្ហាញក្តីព្រួយបារម្ភពីការរាលដាលគ្រឿងញៀន ចូលទៅដល់ទីជនបទ។ សម្តេចក្រឡាហោម ស ខេង បានលើកឡើងថា ក្នុងមួយថ្ងៃមានខេត្តចំនួន៦ ទៅ១០ខេត្ត បានរកឃើញនូវករណីបទល្មើសគ្រឿងញៀន ចន្លោះពី១ ទៅ ២ករណី ដែលបង្កឲ្យមានក្តីបារម្ភជាខ្លាំង។
នៅថ្ងៃសៅរ៍ទី០៧កុម្ភៈ លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់វិទ្យុបារាំងអន្ដរជាតិ RFI នេះថា គោលការណ៍ភូមិ ឃុំ មានសុវត្ថិភាព នឹងអនុញ្ញាតឲ្យអាជ្ញាធរមូលដ្ឋានអាចអនុវត្តការបង្ក្រាបគ្រឿងញៀនភ្លាមៗ ដោយមិនចាំបាច់ចាំបទបញ្ជាពីថ្នាក់ជាតិ។
សូមរម្លឹកជូនថា ពេញមួយឆ្នាំ ២០២០កន្លងទៅ មានមនុស្សរហូតដល់ជាង ២ម៉ឺននាក់ ត្រូវបានសមត្ថកិច្ចចាប់ឃាត់ខ្លួនពាក់ព័ន្ធនឹងគ្រឿងញៀន។ ចំណែកគ្រឿងញៀនដែលត្រូវរឹបអូស បានជាង ៣ តោន ពីការបង្ក្រាបនៅទូទាំងប្រទេស ដែលមានការកើនឡើងលើសឆ្នាំ ២០១៩ ជាង ៦ ភាគរយ។ ការកើនឡើងនេះ ត្រូវបានមន្ត្រីជំនាញពន្យល់ថា ដោយសារតម្លៃគ្រឿងញៀនចុះថោកប្រហែល៤ដងនៅឆ្នាំ២០២០ ដែលនៅសល់ជិត៤០០០ដុល្លារក្នុង១គីឡូក្រាម ខណៈពីមុនគ្រឿងញៀនមានតម្លៃរាប់ម៉ឺនដុល្លារក្នុង១គីឡូក្រាម។