សម្ដេចតេជោ៖ព្រឹត្តិការណ៍២៨វិច្ឆិកាមិនទាន់ចប់ទេតែនៅបន្តជួយលុយអ្នក្រីក្រ៣ខែទៀតការប្រឡងបាក់ឌុបសិស្សថ្នាក់ទី១២ផ្អាកតែឲ្យជាប់ទាំងអស់រួមទាំងឌីប្លូមផង!
ភ្នំពេញ៖«ព្រឹត្តិការណ៍សហគមន៍ ២៨វិច្ឆិកា» ដែលជាករណីនៃការចម្លងចូលសហគមន៍ដំបូងនៅកម្ពុជា គ្រប់គ្រងបានហើយ តែមិនទាន់បញ្ចប់នោះទេ ព្រោះការបន្តស្រាវជ្រាវរកអ្នកពាក់ព័ន្ធនៅបន្តដំណើរការនៅបណ្តាខេត្តមួយចំនួន ។នេះជាសាររបស់សម្តេចតេជោនាយករដ្ឋមន្ត្រីនាព្រឹកថ្ងៃទី១៥ធ្នូពាក់ព័ន្ធនឹងស្ថានភាពជំងឺកូវីដ១៩ និងការទិញវ៉ាក់សាំងជំងឺកូវីដ១៩។
សម្តេចតេជោ បានបញ្ជាកថា «ព្រឹត្តិការណ៍សហគមន៍ ២៨ វិច្ឆិកា» គឺជាព្រឹត្តិការណ៍ដែលខុសគ្នាពីព្រឹត្តិការណ៍ ៣ វិច្ឆិកា ព្រោះព្រឹត្តិការណ៍សហគមន៍ ២៨វិច្ឆិកា គឺជាព្រឹត្តិការណ៍ធ្ងន់ធ្ងរខ្លាំងសម្រាប់កម្ពុជាដែលគិតមកដល់ព្រឹកថ្ងៃទី ១៥ ខែធ្នូ គឺរកឃើញអ្នកឆ្លងសរុបដល់ ៤១ នាក់ នៃករណីវិជ្ជមានកូវីដសរុបទូទាំងប្រទេសចំនួន ៣៦២ ករណី ក្នុងនោះអ្នកជំងឺ៣១២ បានជាសះស្បើយ។
ទាក់ទងរឿងនេះសម្តេចតេជោ ហ៊ុន សែន បានប្រកាសថា សម្តេច បានសម្រេចផ្តល់សាច់ប្រាក់ឧបត្ថម្ភ ជុំទី៤ សម្រាប់គ្រួសារពលរដ្ឋក្រីក្រ ដែលរងផលប៉ះពាល់ដោយសារកូវីដ១៩ នៅទូទាំំងប្រទេស។ ជុំទី៤នេះ មាន ៣ខែ គឺមករា កុម្ភៈ និងខែមីនា ឆ្នាំ២០២១។សូមបញ្ជាក់ថា៖ ចាប់តាំងពីខែមិថុនា រហូតដល់ខែធ្នូ ឆ្នាំ២០២០នេះ រាជរដ្ឋាភិបាល បានឧបត្ថម្ភសាច់ប្រាក់ចំនួន៣ជុំ ដែលអស់ទឹកប្រាក់សរុបប្រមាណជាង ១៦០លានដុល្លារអាមេរិក។ សម្រាប់គ្រួសារពលរដ្ឋក្រីក្រដែលទទួលបានសាច់ប្រាក់កាលពីខែវិច្ឆិកាកន្លងទៅ គឺមានរហូតដល់ចំនួន ៧០៣ ៥៩២គ្រួសារ។ ប្រសិនបើក្រោយខែមីនា ឆ្នាំ២០២១ ស្ថានភាពកូវីដ១៩ នៅតែមិនទាន់ស្រាកស្រាន្ត នោះ សម្តេច នឹងបន្តកម្មវិធីឧបត្ថម្ភសាច់ប្រាក់នេះជាបន្តទៀត។ សម្តេចថា បានត្រៀមថវិកា ២០០លានដុល្លារអាមេរិក សម្រាប់អនុវត្តកម្មវិធីនេះ។
ដោយសារលទ្ធភាពនៃការប្រឡងមិនអាចធ្វើបាននៅថ្ងៃទី១១មករា២០២១ខាងមុខនេះសម្តេច នាយករដ្ឋមន្ត្រីកម្ពុជា បានផ្ដល់ស្នើឲ្យក្រសួងអប់រំ យុវជន និងកីឡា ពិនិត្យវាយតម្លៃលទ្ធផលសិស្សថ្នាក់ទី១២ និងប្រឡងឌីប្លូមដើម្បីកំណត់ឲ្យជាប់ទាំងអស់គ្នា ។សម្តេចបានបញ្ជាក់ថា ការបិទប្រកាសបិទព្រឹត្តិការណ៍សហគមន៍ ២៨ វិច្ឆិកា អាចនឹងកើតឡើងក្រោយថ្ងៃទី ២០ មករា ២០២១ ឯណោះ អ៊ីចឹងទេ សុំឲ្យក្រសួងអប់រំពិចារណាទៅ ទៅលើលទ្ធភាពទី ៣ នៃការវាយតម្លៃ ដោយសារតែសិស្សរាប់រយលាននាក់លើពិភពលោក រួមទាំងកម្ពុជាផង មិនបានរៀនសូត្រទេ យើងត្រូវទទួលយកនូវហេតុការណ៍ពិតប្រាកដ គ្រូ សិស្ស ក៏អត់ទាន់មានវ៉ាក់សាំងការពារ មិនទាន់មានមនុស្សស្លាប់ផង គេចោទថាយើងលួចលាក់ មិនបង្ហាញ ដូច្នេះគ្រូនិងសិស្ស មាតាបីតាសិស្សក៏មិនស្ងប់ចិត្តដែរក្នុងការឲ្យកូនទៅប្រឡងបាក់ឌុបនោះ ។
អ្នកនាំពាក្យក្រសួងអប់រំយុវជន និងកីឡាបានឲ្យដឹងថា សម្រាប់បេក្ខជន ដែលបានចុះឈ្មោះប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ក្នុងឆ្នាំ២០២០នេះ គឺមានជាង១២ម៉ឺននាក់ដែលនឹងចូលរួមប្រឡងបាក់ឌុបឆ្នាំ២០១៩-២០២០ ។ក្រៅពីនេះសម្តេចបានបានប្រកាសផ្តល់អាទិភាពក្របខណ្ឌគ្រូពេទ្យបន្ថែមសម្រាប់ក្រសួងសុខាភិបាល ក្នុងការពង្រឹងវិស័យសុខាភិបាល ជាពិសេសប្រយុទ្ធប្រឆាំងនឹងជំងឺកូវីដ១៩។
សម្តេចតេជោ ហ៊ុន សែន បានបញ្ជាឱ្យក្រសួងសុខាភិបាល ក្រសួងសេដ្ឋកិច្ច និងហរិញ្ញវត្ថុ និងក្រសួងមុខងារសាធារណៈ ពិភាក្សាគ្នាពីតម្រូវការក្របខណ្ឌគ្រូពេទ្យ ដែលត្រូវរើសបន្ថែមនាពេលខាងមុខ ដោយការប្រឡងជ្រើសរើស ឬរើសចេញពីគ្រូពេទ្យជាប់កិច្ចសន្យា។ សម្តេចតេជោ ហ៊ុន សែន ក៏បានណែនាំផងដែរសម្រាប់ការរើសគ្រូពេទ្យថ្មី មិនមែនចូលមកដើម្បីតែយកក្របខណ្ឌប៉ុណ្ណោះទេ តែត្រូវបំពេញការងារ ជាពិសេសគឺការងារប្រយុទ្ធប្រឆាំងនឹងជំងឺកូវីដ១៩។
ក្រៅពីប្រកាសថារាជរដ្ឋាភិបាលទិញតែវ៉ាកសាំងណាដែលទទួលស្គាល់ដោយអង្គការសុខភាពពីភពលោកសម្តេចតេជោ ហ៊ុន សែន ក៏បានបញ្ជាឱ្យក្រសួងសុខាភិបាល ទិញម៉ាស៊ីនជំនួយដង្ហើម និងម៉ាស៊ីនតាមដានជីវិតបន្ថែមទៀត ដើម្បីទុកប្រើប្រាស់ មិនត្រឹមតែសម្រាប់បញ្ហាកូវីដ១៩នោះទេ តែសម្រាប់អ្នកជំងឺផ្សេងទៀតដែលត្រូវការ។ សម្តេចតេជោ ប្រាប់រដ្ឋមន្ត្រីក្រសួងសុខាភិបាល ត្រូវពង្រឹងសេវាសុខាភិបាលនៅតាមមូលដ្ឋានទាំងអស់ ហើយបើត្រូវការគ្រឿងបរិក្ខាពេទ្យ ត្រូវឡើងគម្រោងស្នើសុំថវិកាដើម្បីទិញ.។
សម្រាប់ការប្រឆាំងកូវិតសម្តេចតេជោ ហ៊ុន សែន ក៏បានផ្តល់អនុសាសន៍ និងបទបញ្ជាចំនួន៤ ដើម្បីទប់ស្កាត់ព្រឹត្តិការណ៍សហគមន៍ ទប់ស្កាត់នឹងជំងឺកូវីដ-១៩ រួមមាន៖
១៖ តាមដានអ្នកនៅសេសសល់មិនទាន់ធ្វើតេស្តគ្រប់ចំនួន ឬធ្វើចត្តាឡីស័កមិនទាន់គ្រប់ថ្ងៃឲ្យបានម៉ឺងម៉ាត់។ អាជ្ញាធរត្រូវពិនិត្យ កុំពឹងផ្អែកលើគ្រូពេទ្យ គ្រពេទ្យហត់ណាស់ហើយ។
២៖ ត្រូវអនុវត្ត ៣ការពារ (១៖ ពាក់ម៉ាស់, ២៖ លាងដៃ, ៣៖ គម្លាតសុវត្ថិភាពសង្គម និងគម្លាតសុវត្ថិភាពបុគ្គល ដោយចាប់ពី ១ម៉ែត្រកន្លះឡើងទៅ ឲ្យបានគ្រប់គ្នា នៅគ្រប់ទីកន្លែង)។
៣៖ ត្រូវអនុវត្ត ៣កុំ (១៖ កុំចូលទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក រកកន្លែងមានខ្យល់ចេញចូល, ២៖ កុំទៅកន្លែងមនុស្ស ច្រើនកុះករ។ ៣៖ កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម ពេលជួបគ្នា អ្នកមានផ្តាសាយ ឬសង្ស័យមានជំងឺកូវីដ១៩ កុំចេញក្រៅ ហើយត្រូវទាក់ទង ទៅគ្រូពេទ្យ)។
៤៖ នៅតាមកន្លែងលក់ដូរ ភោជនីយដ្ឋាន អាហារដ្ឋាន ផ្សារទំនើប និងធនាគារ ត្រូវត្រួតពិនិត្យបើគ្មានម៉ាសមិនឲ្យចូល វ៉ាស់កម្តៅ និងរៀបចំកន្លែងអង្គុយរក្សាគម្លាត តាមបន្ទប់ទឹកត្រូវមានសាប៊ូលាងដៃ។គូសបញ្ជាក់ផងដែរថា សម្តេចតេជោ ហ៊ុន សែន កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងទៅថ្មីៗនេះ បានចេញបទបញ្ជាបន្ទាន់មួយ ដោយប្រកាសមិនអនុញ្ញាតឲ្យមាន ការជួបជុំមនុស្សច្រើន មិនលើសពី២០នាក់ និងសូមឲ្យផ្អាកការរៀបចំពិធីអាពាហ៍ពិពាហ៍ រយៈពេល១៥ថ្ងៃ៕
