វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 741 នាក់
ម្សិលមិញ 5168 នាក់
សរុប 16012875 នាក់
អាមេរិក៖ មន្ត្រីស៊ើបការណ៍សម្ងាត់កំពូលម្នាក់ របស់សហរដ្ឋអាមេរិក កាលពីថ្ងៃទី៣ធ្នូបានចាត់ទុកប្រទេសចិនថា ជាការគំរាមកំហែងដ៏ធំបំផុត ចំពោះលទ្ធិប្រជាធិបតេយ្យ និងសេរីភាពទូទាំងពិភពលោក ដែលមិនធ្លាប់មានចាប់តាំងពីក្រោយ សម័យសង្គ្រាមលោកលើកទី ២។
សារព័ត៌មាន CNA នៅរសៀលថ្ងៃសុក្រ ទី០៤ ខែធ្នូ ឆ្នាំ២០២០បានផ្សាយថា៖លោក ចន រ៉េតឃ្លីហ្វ (John Ratcliffe) នាយកទីភ្នាក់ស៊ើបការណ៍សម្ងាត់ជាតិអាមេរិកបានគូសបញ្ជាក់នៅក្នុងអត្ថបទមួយ នៅលើគេហទំព័ររបស់កាសែតអាមេរិក Wall Street Journal ថា «ការស៊ើបការណ៍សម្ងាត់គឺច្បាស់ហើយថា ទីក្រុងប៉េកាំងពិតជាមានបំណងត្រួតត្រា លើសហរដ្ឋអាមេរិក និងពិភពលោកទាំងមូលខាងផ្នែក សេដ្ឋកិច្ច យោធា និងបច្ចេកវិទ្យា ដែលនេះអាចបញ្ជាក់បានថា ចិនបាន និងកំពុងបង្កការគំរាមកំហែង ដ៏ធំបំផុតដល់សហរដ្ឋអាមេរិក ព្រមទាំងលទ្ធិប្រជាធិបតេយ្យ និងសេរីភាពទូទាំងពិភពលោក ចាប់តាំងពីសង្គ្រាមលោកលើកទី ២ មកម្ល៉េះ»។
លោក Ratcliffe បានសង្កត់ធ្ងន់បន្ថែមទៀតថា យុទ្ធសាស្ត្រជ្រៀតជ្រែកផ្នែកសេដ្ឋកិច្ចរបស់ចិនមានបីផ្នែក នោះគឺការលួចចម្លង និងជំនួស។ យុទ្ធសាស្ត្រនេះ គឺសម្រាប់ឱ្យអង្គភាពចិនចូលលួច កម្មសិទ្ធិបញ្ញារបស់ក្រុមហ៊ុនអាមេរិក ដោយការលួចចម្លង ហើយបន្ទាប់មកដាក់លក់ជំនួសក្រុមហ៊ុនអាមេរិក នៅក្នុងទីផ្សារពិភពលោក។តែ អ្នកនាំពាក្យក្រសួងការបរទេសចិន លោកស្រី ហួ ឈុនយីង (Hua Chunying) បានវាយបកទៅវិញថា «ការចោទប្រកាន់របស់សហរដ្ឋអាមេរិក ពាក់ព័ន្ធការលួចចម្លងបច្ចេកវិទ្យា គឺជារឿងគួរឱ្យស្អប់ខ្ពើមណាស់»។
គួរបញ្ជាក់ថាអាមេរិកនិងចិន បានប៉ះទង្គិចគ្នាជុំវិញបញ្ហាជាច្រើនទៀត រួមមានការដោះស្រាយរបស់ចិនចំពោះការផ្ទុះឡើង នៃវីរុសកូរ៉ូណា (COVID-19), ការគ្រប់គ្រងតឹងរឹងរបស់ចិន ទៅលើទីក្រុងហុងកុង, ជម្លោះនៅក្នុងតំបន់សមុទ្រចិនខាងត្បូង, ការធ្វើពាណិជ្ជកម្ម និងការចោទប្រកាន់ពីបទរំលោភសិទ្ធិមនុស្ស នៅតំបន់ស៊ីនជាំង (Xinjiang) ផងដែរ។