សេដ្ឋីចិនដែលហ៊ានរិះគន់ប្រធានាធិបតីចិនមួយជីវិតលោកស៊ីជិងពីងត្រូវជាប់គុក១៨ឆ្នាំ
03-April-2024 / ព័ត៌មានអន្តរជាតិ
ប្រទេសចិន៖នៅថ្ងៃអង្គារទី២២កញ្ញានេះមហាសេដ្ឋីអចលនទ្រព្យម្នាក់ ដែលធ្លាប់ចេញមុខរិះគន់លោកប្រធានាធិបតី ស៊ី ជីនពីង ត្រូវបានតុលាការក្នុងប៉េកាំងសម្រេចផ្តន្ទាទោស ឲ្យជាប់ពន្ធនាគារ ១៨ឆ្នាំ និងត្រូវពិន័យឲ្យបង់ប្រាក់ ជាង ៥សែនអឺរ៉ូក្រោមបទចោទប្រកាន់ ប្រព្រឹត្តអំពើពុករលួយ ទទួលសំណូកសូកប៉ាន់ កេងបន្លំលុយរដ្ឋ និង រំលោភអំណាច។
តុលាការក្រុងប៉េកាំងចោទ លោកហ្សិន ឈឿឈាំង ក្នុងនាមជាបុគ្គលមានប្រជាប្រិយភាពក្នុងពិភពអ្នកជំនួញអចលទព្រព្យ បានរំលោភអំណាច សម្រាប់ផលប្រយោជន៍ផ្ទាល់ខ្លួន និងបានកេងបន្លំលុយរដ្ឋប្រមាណ ១១១ លានយ័ន ដែលស្មើនឹងជាង ១៦លានដុល្លារ។គ្មានស្ថាប័នឯករាជ្យណាដើម្បីផ្ទៀងផ្ទាត់ ថា តើលោកហ្សិន ឈឿឈាំងពិតជាបានប្រព្រឹត្តអំពើពុករលួយ ដូចការចោទប្រកាន់របស់តុលាការដែរឬយ៉ាងណានោះទេ?។
ទោះជាយ៉ាងណាលោកហ្សិន ឈឿឈាំងបានទទួលសារភាពកំហុស បទឧក្រិដ្ឋរបស់ខ្លួន និងមិនប្តឹង ឧទ្ធរណ៍នោះទេ។ មហាសេដ្ឋីអចលនទ្រព្យចិន រូបនេះ បានយល់ព្រមទទួលសាលក្រមរបស់តុលាការ ដែលសម្រេចរឹបអូសយកទ្រព្យសម្បត្តិរបស់លោក ដែលបានមកពីសកម្មភាពខុសច្បាប់កន្លងមក។
តាមប្រវត្តិដែលកាសែតក្នុងស្រុកបានសរសេររៀបរាប់កន្លងមក លោក ហ្សិន ឈឿឈាំង ជាកូនរបស់មន្ត្រីក្រសួងពាណិជ្ជកម្ម ធ្លាប់ចូលបម្រើកងទ័ព និងក្លាយជាសមាជិករបស់បក្សកុម្មុយនិស្តចិន តាំងពីឆ្នាំ ១៩៧៤មក។ នៅក្នុងអត្ថបទចុះផ្សាយប្រវត្តិផ្ទាល់ខ្លួនកន្លងមក លោកហ្សិន ឈឿឈាំង បានធា្លប់លើកឡើងថា លោកស្គាល់ជិតដិតមន្ត្រីជាន់ខ្ពស់របស់បក្សកុម្មុយនិស្ត ជាពិសេស អតីតអនុប្រធានគណៈកម្មការប្រយុទ្ធប្រឆាំងអំពើពុករលួយ។ ធ្លាប់ជាអនុប្រធាន របស់លេខាធិការដ្ឋានបក្សកុម្មុយនិស្ត ប៉ុន្តែ លោកមិនដែលធ្វើនយោបាយនោះទេ។ តាមរយៈបក្សកុម្មុយនិស្តចិន លោកបានឡើងតំណែងជាបន្តបន្ទាប់ រហូតក្លាយជានាយកក្រុមហ៊ុនអចលនទ្រព្យ របស់រដ្ឋ ឈ្មោះ Hua Yuan ដែលលោកបានចូលនិវត្តនៅឆ្នាំ ២០១៥។
ការផ្តន្ទាទោសទៅលើមហាសេដ្ឋីអចលនៈទ្រព្យចិនលោក ហ្សិន ឈឿឈាំង នៅពេលនេះ បញ្ជាក់ពីយុទ្ធនាការបង្ក្រាបអ្នកប្រឆាំងនឹងលោកស៊ី ជីនពីង នៅក្នុងចំណោមជួរថ្នាក់នាំជាន់ខ្ពស់របស់ប្រទេសចិន ព្រោះថា លោកហ្សិន ឈឿឈាំងត្រូវបានចាប់ខ្លួន និងរងការស៊ើបអង្កេត នៅក្រោយ លោកចេញមុខនិយាយរិះគន់ លោកស៊ី ជីនពីង ក្នុងរឿងគ្រប់គ្រងជំងឺកូវីដ នៅប្រទេសចិន….។ក្រុមប្រឆាំងអំពើពុករលួយ បានសើរើស៊ើបអង្កេតប្រឆាំង មហាសេដ្ឋីអចលនទ្រព្យ លោកហ្សិន ឈឿឈាំង គឺនៅបន្ទាប់ពី លោកបានសរសេរលិខិតចំហរមួយ រិះគន់ បក្សកុម្មុយនិស្តចិន និងលោកប្រធានាធិបតីចិន លោកស៊ី ជីនពីង។
នៅខែ មីនា នៅក្នុងលិខិតផ្សាយនៅលើបណ្តាញសង្គម របស់លោក ដែលមានអ្នកតាមដាន ជាង ១០លាននាក់ លោកហ្សិន ឈឿឈាំងបានសរសេរឌឺដងថា លោកមិនបានឃើញអធិរាជបង្ហាញគ្រឿងតែងកាយថ្មីនោះទេ។ ប៉ុន្តែ គឺត្លុក ដែលស្រាតននលគក ដែលនៅតែទាមទារ ចាត់ទុកខ្លួនជាអធិរាជ។ នៅក្នុងដាក់លិខិត មហាសេដ្ឋី អចលនទ្រព្យចិន មិនបាននិយាយចំឈ្មោះ លោកប្រធានាធិបតីស៊ី ជីនពីង ប៉ុន្តែ លោកបានសរសេរលិខិតរិះគន់នេះឡើង នៅក្រោយ លោកស៊ី ជីនពីង កាលពីខែ ចុងខែកុម្ភៈ លើកថ្លែងសរសើរការគ្រប់គ្រង បានដោយជោគជ័យ លើវិបត្តិកូវីដ នៅប្រទេសចិន។
លោកហ្សិន ឈឿឈាំងបានសរសេរបន្ថែមថា វិបត្តិកូវីដបានបើកភ្នែកឲ្យគេឃើញ ការពិតមួយដែលថា គណបក្សការពារផលប្រយោជន៍របស់ខ្លួន មន្ត្រីរដ្ឋាភិបាលការពារផលប្រយោជន៍របស់ខ្លួន ចំណែក ព្រះរាជា គិតតែពីការពារ ផលប្រយោជន៍ និងអំណាចស្នូលរបស់ខ្លួន។នៅក្រោយចេញផ្សាយលិខិតរិះគន់ជាសាធារណៈ លោកហ្សិន ឈឿឈាំង បាត់មុខ រហូតដល់ខែមេសា នៅពេលប៉ូលិសសម្រេចបើកការស៊ើបអង្កេតប្រឆាំងលោក ពីបទរំលោភធ្ងន់ធ្ងរវិន័យរបស់បក្ស ដែលជាពាក្យប្រើទូទៅ សម្រាប់ ការប្រព្រឹត្តអំពើពុករលួយ។
នៅខែកក្កដា គណបក្សកុម្មុយនិស្តចិនបានសម្រេចដកកាតសមាជិក បក្សពីលោកហ្សិន ឈឿឈាំង ដែលគណបក្សបានចោទប្រកាន់ថា មិនស្មោះស្ម័គ្រ ចំពោះបក្ស។ ការដកអភ័យឯកសិទ្ធិរបស់បក្សជាការបើកផ្លូវឲ្យមានការចោទប្រកាន់នៅតុលាការ ដែលតាមពិតសម្រេចចេញសាលក្រមតាមខ្សែគូសវាសរបស់បក្សកុម្មុយនិស្ត។
សូមបញ្ជាក់ថា លោកប្រធានាធិបតីចិន ស៊ី ជីនពីង បានបង្កើតយុទ្ធនាការប្រយុទ្ធប្រឆាំង នឹងអំពើពុករលួយ ដើម្បី បង្ក្រាប បោសសម្អាតក្រុមអ្នកប្រឆាំង នៅក្នុងជួរបក្ស និងក្នុងចំណោមមន្ត្រីជាន់ខ្ពស់របស់រដ្ឋាភិបាលមុននឹងលោកធ្វើសន្និបាតប្រកាសជាប្រធានាធិបតីមួយជីវិតរបស់ចិន។
