វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 9239 នាក់
ម្សិលមិញ 8227 នាក់
សរុប 14136120 នាក់
ខេត្តកំពង់ស្ពឺ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាឱ្យស្នងការនគរបាលខេត្តកំពង់ស្ពឺ បញ្ជូនខ្លួនលោក កង ភារី អធិការរងនគរបាលស្រុកសំរោងទង ទៅតុលាការ នៅថ្ងៃទី២២ ខែសីហា ឆ្នាំ២០២០ ដើម្បីចាត់ការតាមផ្លូវច្បាប់ ពាក់ព័ន្ធនឹងករណីបាញ់បោះយ៉ាងអនាធិបតេយ្យ។
នាយឧត្តមសេនីយ៍ នេត សាវឿន បានប្រាប់កាសែត កាលពីល្ងាច ថ្ងៃទី២១ ខែសីហា ថា លោក កង ភារី អធិការរងនគរបាលស្រុកសំរោងទង បានរំលោភលើបទបញ្ជា ពេលថ្ងៃឈប់សម្រាកជំនួសចូលឆ្នាំខ្មែរ។ តាមបទបញ្ជានេះ មន្ដ្រីនគរបាលត្រូវប្រចាំការការពារជូនប្រជាពលរដ្ឋ ប៉ុន្ដែគាត់បែរជាដើរផឹកស្រាស្រវឹង និងបាញ់បោះសេរី ខុសច្បាប់។ ករណីនេះ លោកបានបញ្ជាទៅស្នងការនគរបាលខេត្តកំពង់ស្ពឺ បញ្ជូនខ្លួនអធិការរងនគរបាលស្រុកសំរោងទង ទៅតុលាការ នៅថ្ងៃទី២២ ខែសីហា ដើម្បីចាត់ការតាមផ្លូវច្បាប់។
សូមបញ្ជាក់ថាកាលពីថ្ងៃទី១៨ ខែសីហា លោក កង ភារី អធិការរងនគរបាលស្រុកសំរោងទងខាងលើ បានដើរផឹកស៊ីស្រវឹង ហើយបានបាញ់បោះបង្អូតកូនចៅ បង្កឲ្យភ្ញាក់ផ្អើលដល់ប្រជាពលរដ្ឋ ។ លោកអធិការរងដ៏ទំនើងរូបនេះ ក៏ត្រូវបានសមត្ថកិច្ច នៃការិយាល័យអន្តរាគមន៍ ឃាត់ខ្លួន កាលពីវេលាម៉ោង២២ និង៣០នាទីថ្ងៃទី១៩ ខែសីហា។
អធិការដ្ឋាននគរបាលស្រុកសំរោងទងផ្ញើសេចក្តីរាយការណ៍ចុះថ្ងៃទី២០ ខែសីហាឆ្នាំ២០២០ ជូនលោកស្នងការនគរបាលខេត្តកំពង់ស្ពឺ បានរៀបរាប់ថា កាលពីថ្ងៃទី១៨ ខែសីហា ឆ្នាំ២០២០ វេលាម៉ោង៩នាទី លោកវរសេនីយ៍ទោ កង ភារី អធិការរងទទួលការងារសន្តិសុខ នៃអធិការដ្ឋាននគរបាលស្រុកសំរោងទង បានយកអាវុធខ្លីរបស់ខ្លួនមួយដើម ម៉ាក ឡុក ឈរបាញ់បោះយ៉ាងអនាធិបតេយ្យបំផុតចំនួន៣គ្រាប់ នៅចំណុចមាត់ស្រះទឹកខាងត្បូង ស្ថិតក្នុងបរិវេណសាលាស្រុក។ លុះមកដល់ថ្ងៃទី១៩ ខែសីហា ឆ្នាំ២០២០ វេលាម៉ោង១៨ និង៣០នាទី លោកវរសេនីយ៍ទោ កង ភារី អធិការរងក៏បាននាំកូនចៅ ក្រោមឱវាទទៅផឹកស៊ី រហូតស្រវឹង ហើយនិយាយអួតក្អេងក្អាង ហើយយកអាវុធខ្លី ម៉ាក ឡុក ដដែល មកឈរបាញ់បោះលេងយ៉ាងសេរី នៅលើមាត់ស្រះ ក្នុងបរិវេណសាលាស្រុក ដោយមានកូនចៅរបស់គាត់ជាច្រើនដែលផឹកស៊ីជាមួយ ចូលរួមបាញ់បោះដែរ។
អ្នកដែលចូលរួមបាញ់បោះជាមួយអធិការរង រូបនេះ រួមមាន លោកអនុសេនីយ៍ឯក ដន សុខុម ឋានៈនាយរងផ្នែកសន្តិសុខ បាញ់ចំនួន២គ្រាប់ លោកអនុសេនីយ៍ត្រី ព្រីង ឡងឌី ឋានៈនាយរងប៉ុស្តិ៍វល្លិសបាញ់ចំនួន២គ្រាប់ លោកអនុសេនីយ៍ត្រី តាន់ សៅលី ឋានៈនាយរងផ្នែកគ្រឿងញៀនបាញ់ចំនួន២គ្រាប់ លោកអនុសេនីយ៍ត្រី ម៉ាន់ ប៊ុណ្ណារ៉ា ឋានៈនាយរងផ្នែកគ្រឿងញៀនបាញ់ចំនួន០២គ្រាប់ លោកព្រិន្ទបាលទោ ឌី សូភក្តិ ឋានៈមន្ត្រីប៉ុស្តិ៍ទំព័រមាស បាញ់ចំនួន២គ្រាប់។ រីឯនៅកន្លែងបាញ់បោះនោះ ត្រូវបានសមត្ថកិច្ចជំនាញបានរកឃើញសំបកគ្រាប់ ចំនួន១១។
លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានប្រាប់អ្នកសារព័ត៌មាន ថា លោកបានរាយការណ៍ទៅថ្នាក់លើ ដើម្បីដាក់ទោសតាមវិន័យរបស់កងកម្លាំង នៃអគ្គស្នងការដ្ឋាននគរបាលជាតិ លេខ០០៦ ឲ្យ សមតាមទោសកំហុស ដែលមន្ត្រីនគរបាលយុត្តិធម៌បានប្រព្រឹត្ត។
បើតាមលោកស្នងការខេត្តលោកវរសេនីយ៍ទោ កង ភារី បានធ្វើសកម្មភាពបាញ់បោះសេរីចំនួន២លើក គឺកាលពីថ្ងៃទី១៨ ខែសីហា ឆ្នាំ២០២០ ដោយបាញ់ចំនួន០៣គ្រាប់ និងនៅយប់ថ្ងៃទី១៩ ខែសីហា ឆ្នាំ២០២០ បាញ់ចំនួន១៧គ្រាប់បន្ថែមទៀត៕