អាជ្ញាធរខណ្ឌដូនពេញឲ្យហ្វេសប៊ុក Ly Fu ដែលរាយការណ៍ចូលហ្វេសប៊ុក សម្ដេចហ៊ុន សែន ពីរឿងត្រូវបង់លុយចំនួន200ដុល្លារ ក្នុង១ខែដើម្បីកុំឲ្យបិទប្តឹងទៅអង្គភាពប្រឆាំងអំពើពុករលួយ
21-September-2026 / ព័ត៌មានជាតិ
ភ្នំពេញ៖ បន្ទាប់ពីមានការរើរុះហាងលក់ដូរដែលបង្កការរខាននៅក្រោយវាំងដោយអាជ្ញាខណ្ឌដូនពេញរួចមកមានគណនីហ្វេសប៊ុកមួយឈ្មោះ Ly Fu បានចូលធ្វើការ Comments នៅក្នុងហ្វេសប៊ុកផេករបស់ សម្ដេចហ៊ុន សែន រាយការណ៍ពីរឿងអាជ្ញាខណ្ឌ័ទារលុយបង់ខែជំនួសឲ្យការបិទហាងពួកគេ។
” ជម្រាបសម្តេចក៏ជាទីគោរព, ក្មួយជាប្រជាពលរដ្ឋដែលរស់នៅម្តុំក្រោយវាំង លើផ្លូវ២១៤ កំពុងត្រូវបានរងគំនាបពី រដ្ឋបាលខណ្ឌដូនពេញ ក្នុងរបររកស៊ីចិញ្ចឹមជីវិត (គាត់ទារឲ្យពួកខ្ញុំអ្នករកស៊ីត្រូវបង់ប្រចាំខែឲ្យពួកគាត់ $200/១ខែ) បើមិនបង់ គាត់ឲ្យបិទអាជីវកម្មដូចក្នុងរូបភាពចឹង ។ ក្នុងនាមខ្ញុំជាប្រជាពលរដ្ឋ រស់នៅក្រោមការគ្រប់គ្រងរបស់សម្តេច ស្នើសុំសម្តេចជួយដោះស្រាយឲ្យក្មួយផង, ដោយក្តីគោរពពីក្មួយ”។
ក្រុមការងារប្រតិកម្មរហ័ស ខណ្ឌដូនពេញនៅថ្ងៃទី២៧ខែធ្នូឆ្នាំ២០១៩នេះ បានចេញសូមធ្វើការឆ្លើយបំភ្លឺ ករណីមាន គណនីហ្វេសប៊ុកឈ្មោះ Ly Fu បានធ្វើការ Comments នៅលើហ្វេសប៊ុកផេករបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា។
រដ្ឋបាលខណ្ឌដូនពេញ សូមជម្រាបជូនដំណឹងដល់បងប្អូនប្រជាពលរដ្ឋ និងមតិសាធារណៈមេត្តាជ្រាបដូចខាងក្រោម៖ ចំពោះករណីសម្រេចបិទអាជីវកម្មលក់ស្រាក្រឡុក នៅផ្លូវលេខ២១៤ ស្ថិតក្នុងសង្កាត់ជ័យជំនះ ខណ្ឌដូនពេញ កន្លងមក ដោយផ្អែកលើបញ្ហាមួយចំនួនរួមមាន៖
១-ពួកគាត់សាងសង់រោងហ្វេមដែករំលោភលើដីសួនច្បារសាធារណ:របស់រដ្ឋ ដោយគ្មានការអនុញ្ញាតពីអាជ្ញាធរមូលដ្ឋាន ដែលត្រូវតែបិទ និងរុះរើចេញជាដាច់ខាត ។
២-ប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់របៀបរៀយរយសាធារណ:ធ្ងន់ធ្ងរ ព្រមទាំងបង្កភាពអនាធិបតេយ្យ ។
៣-បង្កសំឡេងរំខានខ្លាំងៗដល់អ្នករស់នៅជុំវិញទីតាំងនោះ ជាពិសេសទីតាំងនេះនៅក្បែរព្រះបរមរាជវាំង ដែលជាទីគង់ប្រថាប់របស់ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះវររាជមាតាជាតិខ្មែរនៃយើង ព្រះញាតិវង្ស និងមន្ដ្រីថ្នាក់ដឹកនាំ នៃព្រះបរមរាជវាំងផងដែរ ។
៤-អាជ្ញាធរសង្កាត់ បានចេញសេចក្តីជូនដំណឹង និងបានចុះទៅធ្វើកំណត់ហេតុណែនាំឲ្យម្ចាស់ទីតាំងអាជីវកម្មទាំងអស់ ធ្វើការបិទអាជីវកម្ម និងត្រូវធ្វើការរុះរើសំណង់ហ្វែមដែក ដែលពួកគាត់បានសាងសង់ដោយខុសច្បាប់ រំលោភទៅលើដីសួនច្បារសាធារណៈរបស់រដ្ឋ ដោយស្ម័គ្រចិត្តខ្លួនឯង ប៉ុន្តែពួកគាត់ មិនព្រមចូលរួមអនុវត្តតាមការណែនាំ និងជូនដំណឹងរបស់អាជ្ញាធរមូលដ្ឋានឡើយ ។
ដូច្នេះ ដើម្បីរក្សាបាននូវសន្ដិសុខ សុវត្ថិភាព សណ្ដាប់ធ្នាប់ របៀបរៀបរយសាធារណៈ ក៏ដូចជាធានាបាននូវភាពស្ងប់ស្ងាត់ ជុំវិញព្រះបរមរាជវាំងផងនោះ រដ្ឋបាលខណ្ឌ ត្រូវតែចាត់វិធានការជាបន្ទាន់ និងអនុវត្តតាមផ្លូវច្បាប់ចំពោះការរំលោភបំពានសួនច្បារសាធារណៈផងដែរ ។
ចំពោះករណី ដែលគណនីហ្វេសប៊ុកឈ្មោះ Ly Fu បានធ្វើការ Comments នៅលើហ្វេសប៊ុកផេករបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ថាពួកគាត់រងគំនាបពីរដ្ឋបាលខណ្ឌដូនពេញ ថា “គាត់ទារឲ្យពួកខ្ញុំអ្នករកស៊ីត្រូវបង់ប្រចាំខែឲ្យពួកគាត់ 200$/១ខែ)បើមិនបង់គាត់ឲ្យបិទអាជីវកម្ម…….” រដ្ឋបាលខណ្ឌ គ្មានគោលការណ៍យកប្រាក់ ឬបង់សេវាផ្សេងៗ ដើម្បីជាថ្នូរនឹងការមិនអនុវត្តវិធានការរដ្ឋបាល ឬវិធានការច្បាប់ឡើយ និងសូមធ្វើការបដិសេធទាំងស្រុងចំពោះករណីនេះ ហើយករណីជំរិតទារប្រាក់ជាបទល្មើសព្រហ្មទណ្ឌជាអាទិ៍ ។
ប៉ុន្ដែរដ្ឋបាលខណ្ឌ សូមស្នើឲ្យសាមីខ្លួន ឬអ្នករងគ្រោះលើករណីខាងលើ ដាក់ពាក្យបណ្ដឹងទៅអង្គភាពប្រឆាំងអំពើពុករលួយ ឬសមត្ថកិច្ចពាក់ព័ន្ធ ចំពោះបុគ្គលណាដែលបានប្រព្រឹត្តខុសច្បាប់ ឬដាក់ពាក្យបណ្ដឹងចូលមករដ្ឋបាលខណ្ឌដូនពេញ ដោយសូមបញ្ជាក់ឈ្មោះបុគ្គលនោះ ឬភស្ដុតាងពាក់ព័ន្ធផ្សេងៗ ដើម្បីរដ្ឋបាលខណ្ឌ ចាត់វិធានការរដ្ឋបាល និងអនុវត្តតាមច្បាប់ជាធរមាន ហើយរដ្ឋបាលខណ្ឌ សូមធានារក្សាការសម្ងាត់ចំពោះព័ត៌មាន ឬពាក់បណ្ដឹងរបស់បងប្អូនទាំងស្រុង ៕
