១៩ឆ្នាំស្រុកខ្មែរគម្រោងអគារខ្ពស់ៗចាប់ពី៥ជាន់ ឡើងទៅនៅទូទាំងប្រទេសមានចំនួន ១,៦២៤អគារ
26-March-2024 / សេដ្ឋកិច្ច
ភ្នំពេញ៖ ក្នុងឆ្នាំ២០១៩ ក្រសួងរៀបចំដែនដី នគរូបនីយកម្ម និងសំណង់ បានចុះរុះរើសំណង់ដែលមានហានិភ័យខ្ពស់ ចំនួន២៣ការដ្ឋានណែនាំឱ្យធ្វើកោសល្យវិច័យចំនួន១៦៦ការដ្ឋាន និងណែនាំឱ្យបំពេញនីតិវិធីចំនួន៣៨១ការដ្ឋានបន្ទាប់ពីបានត្រួតពិនិត្យគុណភាពសំណង់នៅខេត្តព្រះសីហនុចំនួន ៥៧០ ។ នេះបើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងឆ្នាំ២០១៩ ។
របាយការណ៍ បានបង្ហាញថា ក្នុងឆ្នាំ២០១៩នេះ ទិន្នន័យសំណង់ ទូទាំងប្រទេសមានចំនួន ៤,៤៤៦គម្រោង ក្រោមទុនវិនិយោគប្រមាណ ៩ពាន់លានដុល្លារ ដែលកើនឡើងប្រមាណ៧៨,៨៨ភាគរយ បើធៀបនឹងឆ្នាំ២០១៨។ក្នុងឆ្នាំ២០១៩នេះ គម្រោងអគារខ្ពស់ៗនៅកម្ពុជា ចាប់ពី៥ជាន់ឡើង មានចំនួន ៤៣២គម្រោង ស្មើនឹង៤៣៦អគារ (ខេត្តព្រះសីហនុមានគម្រោងអគារខ្ពស់ៗចាប់ពី៥ជាន់ឡើងចំនួន២០៣អគារ) ក្នុងនោះពី៥ជាន់ទៅ៩ជាន់ មានចំនួន២០៨អគារ ពី១០ជាន់ ទៅ១៩ជាន់ មានចំនួន១៣៥អគារ ពី២០ជាន់ ទៅ២៩ជាន់ មានចំនួន ៥៧អគារ ពី ៣០ជាន់ ទៅ៣៩ជាន់ មានចំនួន២៣អគារ ពី៤០ជាន់ ឡើងទៅមានចំនួន១៣អគារ។
ដោយឡែក សំណង់លំនៅឋាននៅកម្ពុជា ក្នុងឆ្នាំ២០១៩ មានចំនួន ៣,៧៣២ គម្រោងមានផ្ទៃក្រឡា កម្រាលសំណង់ចំនួន ៨,០២៤,២៨៦ម៉ែត្រការ៉េ មានទុនវិនិយោគ ៣,៦៦១,២៧៥,៣៥០ដុល្លារ ស្មើនឹង ៣៨,៤៨៨ខ្នង។ ចំណែកឯកជន/ល្វែងបុរីលំនៅឋាន និងបណ្ដុំលំនៅឋានមានលក្ខណៈបុរីនៅទូទាំងប្រទេស ចំនួន៤០គម្រោង ស្មើនឹង ១៦,៥៨៩ខ្នង មានផ្ទៃក្រឡាកម្រាលសំណង់សរុប ២,៤៩៦,៣៥៨ម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណ ៨២១,៣០៦,៦៧៦ដុល្លារ។
អគារផ្ទះល្វែង និងភូមិគ្រឹះនៅទូទាំងប្រទេសមាន ២០,៧៨១ ល្វែង/ខ្នង មានផ្ទៃក្រឡា កម្រាលសំណង់ ៣,៤៩៩,២០៤ម៉ែត្រការ៉េ ដែលមានតម្លៃ ប៉ាន់ស្មានទុនវិនិយោគប្រមាណ ១,២៦៩,៦៥៣,១៨៨ដុល្លារ។ អគារស្នាក់នៅរួមមាន១៥២ គម្រោង ស្មើនឹង១៧,៧០៧ ចំណែកឯកជន មានផ្ទៃក្រឡាកម្រាលសំណង់ ៣,២០៣,០០១ម៉ែត្រការ៉េ មានតម្លៃប៉ាន់ស្មានទុនវិនិយោគ ប្រមាណ ១,៩០៧,២៦៩,៥៧៨ដុល្លារ។
ដោយឡែក សំណង់សណ្ឋាគារ នៅទូទាំងប្រទេសមាន ចំនួន៦៦គម្រោង ស្មើនឹង ៩៧៧,៨៦៧ ម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ៥៨៦,៣៩១,៦៧៦ដុល្លារ សំណង់អគារ ពាណិជ្ជកម្មនៅទូទាំងប្រទេសមានចំនួន ៣១២គម្រោង ស្មើនឹង ៥ ៩២៨ ៩៨៥ម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ៣,៥១៨,០៥៣,០៤៣ដុល្លារ។សម្រាប់សំណង់អគាររោងចក្រនៅទូទាំងប្រទេស ក្នុងឆ្នាំ២០១៩នេះ មានចំនួន១២១គម្រោង មានផ្ទៃក្រឡា កម្រាលសំណង់ ២,៦៨៥,២៩៣ម៉េត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ១,១៤១,៧៧៩,៦៩១ដុល្លារ។ សំណង់ អគារពហុមុខងារនៅទូទាំងប្រទេសមាន ចំនួន ៩៤គម្រោង ស្មើនឹង ៥,០៨១,៤៣២ម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ៣,០៤៨,៦៦៤,៦២៦ដុល្លារ។
បើគិតចាប់ពីឆ្នាំ២០០០មក ដល់ឆ្នាំ២០១៩ គម្រោងអគារខ្ពស់ៗចាប់ពី៥ជាន់ ឡើងទៅនៅទូទាំងប្រទេសមានចំនួន ១,៦២៤អគារ (ក្នុងនោះអគារខ្ពស់ៗ ចាប់ពី៥ជាន់ ទៅ៩ជាន់ មានចំនួន៨៧២អគារ អគារចាប់ពី១០ជាន់ ទៅ១៩ជាន់ មានចំនួន៤៦១អគារ អគារចាប់ពី ២០ជាន់ ទៅ២៩ជាន់ មានចំនួន១៥៦អគារ អគារចាប់ពី៣០ជាន់ទៅ ៣៩ជាន់ មានចំនួន៩៥អគារ អគារចាប់ពី៤០ជាន់ ឡើងមានចំនួន៤០អគារ។ ដោយឡែកនៅខេត្តព្រះសីហនុ មានអគារចាប់ ពី៥ជាន់ ទៅចំនួន២៣៨អគារ គម្រោងបុរី លំនៅឋាន និងបណ្ដុំលំនៅឋានមានលក្ខណៈបុរី មានចំនួន ២៩៨គម្រោង និងលំនៅឋាន មានលក្ខណៈជាអគារសហកម្មសិទ្ធិ ក្នុងរាជធានីភ្នំពេញ គិតចាប់ពីឆ្នាំ២០១១ រហូតដល់ឆ្នាំ២០១៩ មានចំនួន ២២,២៦៩ ចំណែកឯកជន។
ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ប្រកាសថា នៅឆ្នាំ២០២១ ខាងមុខនេះ ក្រសួងរៀបចំដែនដី នឹងចុះបញ្ជីក្បាលដី ៧លានក្បាលដី ជូនដល់ប្រជាពលរដ្ឋឱ្យអស់ ខណៈនៅឆ្នាំ២០១៩នេះ ក្រុមការងារបានចុះបញ្ជីក្បាលដី បាន ៨០.២២ភាគរយ ដើម្បីធានានូវសុវត្ថិភាពនៃការកាន់កាប់ដីធ្លី កាត់បន្ថយវិវាទ និងមានភាពសុខុដុមនៃសង្គម។ការប្រកាសបែបនេះ របស់ឧបនាយករដ្ឋមន្ត្រី ជា សុផារ៉ា បានធ្វើឡើងនៅរសៀលថ្ងៃទី២៥ ខែធ្នូ ឆ្នាំ២០១៩នេះ នៅក្នុងឱកាសដែលលោក អញ្ជើញជាតំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញបិទសន្និបាតនៅសណ្ឋាគារសុខា រាជធានីភ្នំពេញ ដើម្បីបូកសរុបលទ្ធផលការងាររបស់ខ្លួន នៅក្នុងឆ្នាំ២០១៩ និងលើកទិសដៅបន្តសម្រាប់ឆ្នាំ២០២០ ដោយមានការអញ្ជើញចូលរួមពីសំណាក់មន្ត្រីចំណុះក្រសួងរៀបចំដែនដី នគរូបនីយកម្ម និងសំណង់ ប្រមាណ ៣៣០០នាក់ នៅសណ្ឋាគារសុខាភ្នំពេញ។
