មេបក្សអាណាគតម៉ៃដឹកនាំកម្លាំងយុវជនចេញធ្វើបាតុកម្មប្រឆាំងរដ្ឋាភិបាលប្រាយុទ្ធ!
11-March-2026 / ព័ត៌មានអន្តរជាតិ
ប្រទេស៖ នៅថ្ងៃសៅរ៍ ទី១៤ ធ្នូទីក្រុងបាងកកលេចេញនូវបាតុកម្មធំមួយ និងជាលើកដំបូង រាប់ចាប់តាំងពីការបោះឆ្នោតជាតិនាខែមីនាកន្លងមក។ បាតុកម្មដឹកនាំដោយថាណាថន ជាសេដ្ឋីវ័យក្មេង និងជាមេបក្សប្រឆាំងល្បីឈ្មោះថៃ “អណាខុតម៉ៃ”គឺជាការសាកល្បងថ្មីមួយរបស់ក្រុមយុវជនថៃ ដើម្បីបង្ហាញនូវការមិនពេញចិត្តរបស់ពួកគេ ទៅកាន់រដ្ឋាភិបាល ដែលមានលោកប្រាយុទ្ធ ចាន់អូចា ជាមេដឹកនាំ។
មេបក្សប្រឆាំង លោកថាណាថន បានអំពាវនាវឲ្យប្រជាពលរដ្ឋថៃ ជួបជុំគ្នាធ្វើបាតុកម្មនៅរសៀលថ្ងៃសៅរ៍នេះ ដោយសារតែលោកមើលឃើញថា ក្រុមយោធាថៃ នៅតែបង្កើនយុទ្ធនាការរបស់ខ្លួនធ្វើបាប ក្រុមអ្នកប្រឆាំងនៅក្នុងប្រទេស។
អាជ្ញាធរថៃ បានប្រាប់ទីភ្នាក់ងារសារព័ត៌មានបារាំង AFP កងកម្លាំងប៉ូលិសប្រមាណជា ១៥០ នាក់ត្រូវបានដាក់ពង្រាយនៅតាមទីប្រជុំជនសំខាន់ៗ ក្នុងទីក្រុងបាងកក ដើម្បីរក្សាសន្តិសុខ។ អធិការរងក្រុងបាងកកលោកសុំប្រាសុងយិនធម័( Somprasong Yenthuam )បានឲ្យដឹងថា ប្រសិនបើបាតុកម្មនេះ មានរបៀបរៀបរយ និងធ្វើដោយមិនរំលោភច្បាប់ណាមួយនោះទេ ក្រុមបាតុករ អាចបន្តធ្វើវាទៅមុខទៀតបាន។ តែជាមួយគ្នានេះ អធិការរងក្រុងបាងកក ក៏បាននិយាយដែរថា គណបក្សអណាខុតម៉ៃ មិនបានទទួលការអនុញ្ញាតឲ្យធ្វើបាតុកម្មនោះឡើយ។
សូមបញ្ជាក់ថា គណបក្សប្រឆាំង អណាខុតម៉ៃ របស់លោកថាណាថន ទទួលសំឡេងគាំទ្រជាង ៦ លាន ពោលគឺជាប់លេខរៀងទី៣ នៅក្នុងការបោះឆ្នោត កាលពីខែមីនាកន្លង។ ក្រោយការបោះឆ្នោតកាលពីខែមីនា ឆ្នាំ២០១៩នេះ លោក ថាណាថន បានចងសម្ព័ន្ធភាពជាមួយគណបក្សចំនួន៦ផ្សេងទៀត ដើម្បីត្រៀមយកឈ្នះគណបក្សកាន់អំណាចដឹកនាំដោយលោក ប្រាយុទ្ធ ចាន់អូចា។បើបូករួមជាមួយប្រជាប្រិយភាពរបស់លោក ថាណាថន និងគណបក្សចំនួន៦ផ្សេងទៀត ភាគរយកាន់តែខ្ពស់ថា ជាងគណបក្សដែលដឹកនាំដោយលោក ប្រាយុទ្ធ ចាន់អូចា។
អ្នកគាំទ្រលោកថាណាថន ភាគច្រើន គឺជាក្រុមយុវជន ដែលធុញទ្រាន់ នឹងតួនាទីរបស់ពួកយោធា ក្នុងឆាកនយោបាយថៃ។ ប្រជាប្រិយភាព របស់លោកថាណាថន មានកើនឡើងខ្លាំង ដែលធ្វើឲ្យគេជឿថាគណបក្សនេះគឺជាបន្លាក្នុង កែវភ្នែករបស់យោធាថៃ។ប្រធានគណបក្សដែលត្រូវតុលាការដកអាសនៈសភារូបនេះ បាននិយាយថា ” ដល់ពេលយើងត្រូវបញ្ចេញសំឡេងប្រជាជនឱ្យខ្លាំងៗ ដើម្បីឱ្យអ្នកកាន់អំណាចអាចស្តាប់បាន។
ប្រសិនបើអ្នកយល់ស្របជាមួយខ្ញុំថា យើងជាប្រជាជន ត្រូវតែក្រោកឈរ ហើយអំពាវនាវរកភាពស្របច្បាប់យុត្តិធម៌ និងសមភាពនៅក្នុងសង្គមនោះ សូមមកជួបខ្ញុំនៅថ្ងៃទី១៤ខែធ្នូ “។ការអំពាវនាវរបស់លោកធ្វើឡើងបន្ទាប់ពីការសម្រេចរបស់គណៈកម្មការរៀបចំការបោះឆ្នោតកាលពីថ្ងៃពុធស្នើឱ្យតុលាការធម្មនុញ្ញរំសាយគណបក្សអនាគតឆ្ពោះទៅមុខដោយផ្អែកលើហេតុផលថាក្រុមប្រឹក្សាប្រតិបត្តិរបស់ខ្លួនបានទទួលយកប្រាក់កម្ចី១៩១លានបាត ពីលោកថាណាថន សម្រាប់ចំណាយលើយុទ្ធនាការបោះឆ្នោតរបស់ខ្លួន។
តុលាការធម្មនុញ្ញក៏បានដកតំណែងសមាជិកសភាពីមហាសេដ្ឋីវ័យក្មេងរូបនេះ កាលពីខែមុនដោយសារមានបណ្តឹងថាលោកនៅរក្សាភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយមួយនៅពេលលោកចុះបេក្ខភាពរបស់លោកសម្រាប់ការបោះឆ្នោតសកលនៅខែមីនា។កាលពីខែតុលា ឆ្នាំ២០១៩ កន្លងទៅថ្មីៗនេះ ក្រុមយោធាថៃ ធ្លាប់បានចោទប្រកាន់លោកថាណាថន ពីបទចង់បះបោរ។ ក៏ប៉ុន្តែ មេដឹកនាំបក្សប្រឆាំងវ័យ ៤១ ឆ្នាំរូបនេះ បាននិយាយម្តងហើយម្តងទៀតថា ករណីប្រឆាំងនឹងរូបលោក ហើយនិងគណបក្សអណាខុតម៉ៃ ធ្វើឡើងក្រោមហេតុផលនយោបាយតែប៉ុណ្ណោះ៕
