ប្តឹងលោក លឹម ហាក់ មន្ត្រីកងរាជអាវុធហត្ថខេត្តកំពង់ឆ្នាំង ពីបទ ចាប់រថយន្តនិងបង្ខាំងមនុស្ស ជំរិតទារលុយខុសច្បាប់ទៅតុលាការ និង អង្គភាព ប្រឆាំងអំពើពុករលួយ
11-February-2026 / ព័ត៌មានជាតិ
ភ្នំពេញ : ព្រឹកថ្ងៃទី ១១ តុលា ២០១៩នេះ ការិយាល័យនិពន្ធគេហទំព័រ មាតុភូមិ បាន ទទួលពាក្យបណ្តឹងផ្លូវការចំនួនពីរច្បាប់ ទី១ ប្តឹងទៅស្ថាប័នអយ្យការអមសាលាដំបូងខេត្តកំពង់ឆ្នាំង ទី២ ប្តឹងទៅស្ថាប័នអង្គភាពប្រឆាំងអំពើពុករលួយ ។
យោងតាមពាក្យបណ្តឹងរបស់ឈ្មោះ ឈុន ឈីវជាតិ អាយុ ៣៦ឆ្នាំ មានអាសយដ្ឋាននៅភូមិដំបូកកកោះ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង បានរៀបរាប់ថា :កាលពីថ្ងៃទី ២៨ ខែកញ្ញា ២០១៩ ខណ:ដែលគាត់( ឈុន ឈីវជាតិ)កំពុងតែបើករថយន្តទៅចាក់សាំងតែម្នាក់ឯង មានមន្ត្រីកងរាជអាវុធហត្ថចំនួន០២រូបបានឃាត់ចាប់រយន្តរបស់គាត់ហើយថាមេគាត់ចង់ជួប ។
លោក ឈុន ឈីវជាតិ ក៏បានទៅជាមួយមន្ត្រីអាវុធហត្ថ២នាក់នោះ ពេលទៅដល់សាលាក្រុងកំពង់ឆ្នាំងបានជួបឈ្មោះ លឹម ហាក់ ហើយលោក លឹម ហាក់ ចោទថា គាត់ ( ឈុន ឈីវជាតិ) ប្រើឡានអត់ពន្ធ ហើយមេរបស់គាត់អោយយករថយន្តទៅប៉េអឹមក្រុង ទៅដល់ប៉េអឹមក្រុងពួកអាវុធហត្ថបានចាប់ឃុំឃាំង លោក ឈុន ឈីវជាតិ រហូតដល់ម៉ង១២ថ្ងៃត្រង់ ទើបឈ្មោះ លឹម ហាក់មកប្រាប់ថា: គាត់បានរាយការណ៍ជូនព្រះរាជអាជ្ញាអស់ហើយ ៗព្រះរាជអាជ្ញាបានបញ្ជាអោយឃាត់ឡាន និងមនុស្ស ពីបទប្រើប្រាស់ឡានអត់ពន្ធ ហើយបង្គាប់អោយលោក ឈុន ឈីវជាតិ ទាក់ទងទៅក្រុមគ្រួសារដើម្បីយកប្រាក់ចំនួន៥០០០ដុល្លារអាមេរិកទើបគេព្រមដោះលែងរូបគាត់(ឈីវជាតិ) និងរថយន្ត ដោយលោកលឹម ហាក់ ប្រាប់ថាចាំគាត់ជួយនិយាយជាមួយព្រះរាជ្យញាអោយព្រោះរាប់អានគ្នា ។
លោក ឈុន ឈីវជាតិ បន្តថា ទោះបីក្រុមគ្រួសារគាត់បានស្វះស្វែងរត់រកខ្ចីប្រាក់គេបានចំនួន៣៥០០ដុល្លារយកមកប្រគល់អោយក៏លោកលឹមហាក់មិនព្រមលែងដែរបន្តឃុំខ្លួនរហូតដល់ម៉ោង៤រសៀល ទើបក្រុមគ្រួសាររបស់គាត់(ឈីវជាតិ)រកខ្ចីប្រាក់គេបានគ្រប់ចំនួន៥០០០ដុល្លារយកទៅប្រគល់អោយឈ្មោះ ឡុង ឡន ហៅឡុង ជាអ្នកទទួលលុយយកទៅអោយឈ្មោះ លឹម ហាក់ រួចគេធ្វើកិច្ចសន្យាបញ្ឈប់ការប្រើប្រាស់រថយន្តអត់ពន្ធ និងដោះលែងរូបគាត់អោយត្រឡប់ទៅផ្ទះវិញនៅម៉ោងជាង៨យប់ ។
សូមបញ្ជាក់ថា ករណីនេះ អ្នកនាំពាក្យកងរាជអាវុធហត្ថលើផ្ទៃប្រទេសបានតម្រូវអោយសាម៉ីខ្លួននិងអង្គភាពកងរាជអាវុធហត្ថខេត្តកំពង់ឆ្នាំងធ្វើរបាយការណ៍ និងកំណត់ហេតុអោយលំអិតរួចបញ្ជូនមកកងរាជអាវុធហត្ថលើផ្ទៃប្រទេសដើម្បីពិនិត្យមុននឹងចាត់ក្រុមអធិការកិច្ចអាវុធហត្ថចុះទៅស៊ើបអង្កេត ។ ប៉ុន្តែមកដល់ពេលនេះ គេមិនទាន់បានឃើញពី លទ្ធផលនៃស្រាវជ្រាវ ជុំវិញករណីនេះនៅឡើយទេ ព្រោះអ្នកនាំពាក្យអាវុធហត្ថលើផ្ទៃប្រទេសមិនទាន់ ប្រកាសផ្សព្វផ្សាយ ។ ដោយឡែក លោក លឹមហាក់ មន្ត្រីអាវុធហត្ថដែលទទួលរងបណ្តឹង ចោទប្រកាន់ខាងលើ នៅព្រឹកថ្ងៃទី១១តុលា២០១៩ បានប្រាប់មកការិយាល័យនិពន្ធ មាតុភូមិ តាមទូរស័ព្ទថា ករណីនេះ លោកបានបញ្ជូនសំណុំរឿងទៅថ្នាក់លើ និងតុលាការអស់ហើយ បើចង់ដឹង សួរអ្នកនាំពាក្យកងរាជអាវុធហត្ថលើផ្ទៃប្រទេសទៅ ។
ករណី មន្ត្រីនគរបាលយុត្តិធម៌ របស់កងរាជអាវុធហត្ថ ខេត្តកំពង់ឆ្នាំង អនុវត្តនីតិវិធី ដោយចាប់បង្ខាំងមនុស្ស និងរថយន្តដែល ប្រព្រឹត្តឡើងដោយឈ្មោះ លឹម ហាក់ មានឋានន្តរសក្ត័ វរសេនីយ៍ នេះ សង្ឃឹមថា លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស នឹង មិននៅស្ងៀមបណ្តោយអោយមន្ត្រីអាវុធហត្ថខិលខូចមួយចំនួនយកតួនាទី និង ស្បែកអាវុធហត្ថទៅ ប្រព្រឹត្តអំពើស្មោកគ្រោកទៅលើប្រជាពលរដ្ឋជាដាច់ខាត ។ក្រដាស់មិនអាចខ្ចប់ភ្លើងបានទេ ការពិតនឹងត្រូវលាតត្រដាងនៅពេលឆាប់ៗខាងមុខជាក់ជាមិនខាន ប្រសិនបើបើមានការលូកដៃពីពីអង្គភាពប្រឆាំងអំពើពុករលួយតាមពាក្យបណ្តឹងធ្វើការស្រាវជ្រាវ។ព្រោះករណីយ៍នេះប្រសិនបើប៉េអឹមខេត្តកំពង់ឆ្នាំងចង់បង្ក្រាបបទល្មើសឡានគេចពន្ធមែនគឺត្រូវមានការសហការជាមួយមន្ត្រីគយមិនមែនធ្វើតែឯងចាប់កៀបយកលុយចឹងនោះទេ?៕ដោយ: សុផល Tel : 086 911 920 / 012 953 824
