ជីវិតវីជេអាលីយ៉ាកើតមកនៅម្នាក់ឯងស្លាប់ទៅនៅម្នាក់ឯង!
27-March-2024 / សិល្បះនិងបែ្លកៗ
ភ្នំពេញ៖វីជេអាលីយ៉ាអតីតតារាសម្តែងនិងពិធីការិនីអាយុ៣០ឆ្នាំធ្លាប់តែស្រស់បំព្រងបានបាត់បង់ជីវិតតែម្នាក់ឯងនៅមន្ទីរពេទ្យកាល់ម៉ែត្រកន្លែងដេែលនាងកើតដោយ គ្មានអ្នកណានៅជិតនាព្រលឹមថ្ងៃទី២៨មិថុនាឆ្នាំ២០១៨ ដោយសារជំងឺរលាកទងសួរកម្រិតធ្ងន់ ។
សពរបស់ឌីជេ អាលីយ៉ា បាននាំមកតម្កល់ធ្វើបុណ្យនៅវត្តទួលសន្តិវ័ន ស្ថិតក្នុងខណ្ឌឫស្សីកែវ រាជធានីភ្នំពេញ ហើយបានបូជា នៅវេលាម៉ោងជាង៣រសៀលថ្ងៃនេះដោយមានឧកញ៉ាឃ្លោកជាអ្នកឲ្យភ្លើង។
អ្នកនាង សារីណា ភរិយាលោក ស៊ុក សុភា ដែលនៅឆ្ងាយបានប្រកាសាចាត់ចែងរឿងក្ដារមឈូស ។តាមលោក អ៊ឹម ជីវ៉ាបាន ឲ្យដឹងថា រាល់ការខ្វះខាតក្នុងពិធីបុណ្យសព ឌីជេ អាលីយ៉ា ទាំងប៉ុន្មានសមាគមសិល្បៈករខ្មែរជាអ្នករ៉ាប់រង "និយាយឲ្យចំទៅមួយចប់កម្មវិធីបុណ្យសពហ្នឹង បើមានខ្វះខាតប៉ុន្មានសមាគមសិល្បករខ្មែរជាអ្នករ៉ាប់រងទាំងអស់ មិនឲ្យខ្វះខាតឡើយ។ ដូច្នេះខ្ញុំសូមប្រាប់អ្នកដែលគាត់ចាត់ចែងកម្មវិធីបុណ្យហ្នឹងមិនបាច់ភ័យព្រួយរឿងថវិកាទេ រៀបចំកម្មវិធីបុណ្យតាមសម្រួលទៅ"។
ក្រៅពីមានការជួយពីសមាគមសិល្បករខ្មែរ ក៏មានសប្បុរសជនមួយចំនួនជួយដល់ពិធីបុណ្យសព អាលីយ៉ា ផងដែរ។ មានដូចជា សិល្បករសិល្បការិនី បានរៃអង្គាសគ្នា ប្រពន្ធតារាសម្ដែង ស៊ុក សុភា ម្ដាយ ថៃ នរៈពិទូ ជាដើម។ មុនពេលលាចាកលោកទៅ សមាគមសិល្បករខ្មែរ ក៏បានជួយដល់ អាលីយ៉ា ជាង១លានរៀល។ លោក អ៊ឹម ជីវ៉ាបាននាំថវិការលោកខៀវកាញារិទ្ធរដ្ឋមន្ត្រីក្រសួងពតិមាន១លានរៀលជូននាងដែរ។
សូមបញ្ជាក់ថាអាលីយ៉ា មានស្រុកកំណើតនៅរាជធានីភ្នំពេញ និងជាក្មេងកំព្រាឪពុកម្តាយតាំងពីមិនទាន់ដឹងក្តីដោយម្តាយឪពុកបង្កើតបោះបង់ចោលនៅមន្ទីរពេទ្យកាលម៉ែត្រហើយ កុមារីអាលីយ៉ា ត្រូវបានម្តាយធម៌យកមកចិញ្ចឹមបីបាច់។
ក្នុងសង្គមសិល្បៈ អាលីយ៉ាដែលពូកែភាសារអង់គ្លេសត្រូវបាន ចាត់ចូលជាតារាស្រីដែលមានភាពលេចធ្លោលើគ្រប់ទម្រង់ គឺទាំងបុរាណ សម័យ និងស្ទីលអឺរ៉ុប មិនតែប៉ុណ្ណោះអ្នកនាងថែមទាំងមានសមត្ថភាពលើការងារស្ទើរតែទាំងអស់ទៅហើយ ដូចជា DJ តារាម៉ូដែល តារាចម្រៀង និងសម្តែង។
កាលពីអំឡុងខែមិថុនា ឆ្នាំ២០១២ អាលីយ៉ា ធ្លាប់បានផ្ដើមគំនិតក្នុងប្រមូលថវិកាមួយចំនួនពីមិត្តរួមអាជីព និងក្រៅរង្វង់សិល្បៈ ដើម្បីជូនដល់សិល្បករចាប៉ីដ៏ល្បីល្បាញលោកតាភិរម្យ ប្រាជ្ញ ឈួន ។ នាងក៏បានដឹកនាំអ្នកសិល្បៈ និងក្រុមការងារមួយចំនួនចុះទៅសាកសួរសុខទុក្ខ វីរសិល្បករខាងលើដោយផ្ទាល់ដល់ស្រុកកំណើតភូមិសម៉ ឃុំខ្វាវ ស្រុកទ្រាំង ខេត្តតាកែវ។
កាលពីក្នុងអំឡុងខែ កក្កដាឆ្នាំ២០១២ នាងក៏បានផ្តួចផ្តើមបង្កើតព្រឹត្តិការណ៍ប្រគំតន្ត្រី និងសម្តែងទស្សនីយភាពសិល្បៈដ៏ធំមួយ នៅសាលមហោស្រពចតុមុខ មាន ឈ្មោះថា «តន្ត្រីមនុស្សធម៌រៃអង្គាសប្រាក់ជួយកុមារកំព្រា»។ ជាមួយការងារមនុស្សធម៌នេះនាងក៏តែងតែចូលរួមសកម្មភាពជាមួយសិល្បករដទៃក្នុងព្រឹត្តិការណ៍អង្គរសង្ក្រាន្តជាច្រើនឆ្នាំបន្តបន្ទាប់គ្នាផងដែរ។
មុនពេលបាត់មុខសិល្បៈ កាលពីអំឡុងចុងខែកញ្ញា ឆ្នាំ ២០១៦ តារាស្រីរូបនេះធ្លាប់បានចូលរួមដោយស្ម័គ្រចិត្តក្នុងព្រឹត្តិការណ៍ប្រគំតន្ត្រីសប្បុរសធម៌នៅសាកលវិទ្យាល័យន័រតុន ដើម្បីរកថវិកាជួយដល់មន្ទីរពេទ្យគន្ធបុប្ផាផងដែរ។ នៅមានសកម្មភាពសង្គមជាច្រើនទៀតដែលតារាស្រីរូបនេះធ្លាប់បានចូលរួមចំណែកជាមួយសិល្បករដទៃជួយដល់សង្គម។
ជីវិតនាងចាប់ផ្តើមប្រែប្រួលក្រោយពីរងអំពើហិង្សាដោយការវាយធ្វើបាបពីបុរសម្នាក់អស់រយៈពេលជាង២ឆ្នាំមកហើយ ហើយពេលនេះនាងនៅមិនទាន់ទទួលបានយុត្តិធម៌នៅឡើយ។ ក្រៅពីរងសម្ពាធផ្លូវចិត្តដ៏ធ្ងន់ធ្ងរ នាងក៏ត្រូវបានគេរំលោភយកហាងលក់សម្លៀកបំពាក់ បូករួមទាំងសម្ភារៈក្នុងហាងជាច្រើន រហូតធ្វើឲ្យនាងកាន់តែបាត់បង់អស់ទីពឹងមួយផ្នែកធំ។
ទោះបែបនេះក្តី តារាស្រីរូបនេះក៏នៅតែប្រឹងប្រែងបន្តសកម្មភាពសិល្បៈនិងធ្វើខ្លួនជាមនុស្សរឹងមាំម្នាក់ ដោយមិនចុះចាញ់នឹងវិបត្តិផ្លូវចិត្ត និងការមាក់ងាយជាច្រើន។ ប៉ុន្តែការប្រឹងប្រែងរបស់នាងកន្លងមក ហាក់មិនអាចទប់ទល់នឹងរឿងរ៉ាវជាច្រើនបន្តបន្ទាប់។នៅអំឡុងខែកុម្ភៈ ឆ្នាំ២០១៧ អ្នកនាងបានប្រកាសដោយលាក់លៀមពីស្ថានភាពដុនដាបរបស់ខ្លួន ដែលមិនខុសពីអ្នកសុំទាន នោះទេ ព្រោះធ្លាក់ខ្លួនដល់ថ្នាក់សុំបន្ទប់គេស្នាក់នៅ សុំបាយគេហូប គឺរស់ដោយសារតែមិត្តភក្តិលើហ្វេសប៊ុកឲ្យទានប៉ុណ្ណោះ។
ឌីជេ រូបនេះសម្រេចចិត្តប្រកាសសុំជំនួយនៅលើហ្វេសប៊ុក ខណៈចំណូលពីការងារសិល្បៈក្នុងរយៈពេល២ឆ្នាំដែលនាងរងគ្រោះគ្មានទាល់តែសោះ។ការខ្វះខាតមុខក្រោយ ជំងឺផ្លូវចិត្ត បានរុញច្រានឲ្យជីវិតនាងកាន់តែដុនដាប រហូតធ្លាក់ខ្លួនឈឺស្វិតដៃជើង និងជំងឺរលាកទងសួតកាន់តែខ្លាំង រហូតនាងសុខចិត្តរស់នៅក្នុងទីស្ងប់ស្ងាត់ មិនភ្ជាប់ទំនាក់ទំនងជាមួយអ្នកដទៃ។
