វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2984 នាក់
ម្សិលមិញ 6359 នាក់
សរុប 14089617 នាក់
អារ៉ាប៊ីសាអ៊ូឌីត៖ អារ៉ាប៊ីសាអ៊ូឌីតបានចាត់ទុកការប្រកាសការទទួលស្គាល់របស់ប្រធានាធិបតីអាមេរិក លោក ដូណាល់ ត្រាំក្នុងការដាក់បញ្ចូលទឹកដីខ្ពង់រាបហ្គោឡាន់ហ្ស៊ូលទៅអោយអ៊ីស្រាអែលជាសកម្មភាពរំលោភធម្មនុញ្ញអង្គការសហប្រជាជាតិ និងច្បាប់អន្តរជាតិ។
នេះបើតាមចេញសេចក្តីថ្លែងការណ៍ចេញដោយភ្នាក់ងារសារព័ត៌មានអារ៉ាប៊ីសាអ៊ូឌីតបាននិយាយកាលពីព្រឹកថ្ងៃអង្គារនេះ។សេចក្តីថ្លែងការណ៍ បានធ្វើឡើងបន្ទាប់ពីលោក ត្រាំ បានប្រកាសទទួលស្គាល់តំបន់ហ្គោឡាន់ក្នុងទឹកដីស៊ីរី ទៅអោយប្រទេសអ៊ីស្រាអែល។ នៅក្នុងសេចក្តីថ្លែងការណ៍នេះបានសង្កត់ធ្ងន់ផងដែរថា ការសម្រេចចិត្តរបស់ លោក ត្រាំនៅពេលនេះវានឹងមានផលប៉ះពាល់យ៉ាងខ្លាំងទៅលើដំណើរការសន្តិភាព សន្តិសុខ និង ស្ថេរភាព នៅតំបន់នៅមជ្ឈឹមបូព៌ា ។
ទីភ្នាក់ងារសារព័ត៌មានអារ៉ាប៊ីសាអ៊ូឌីតបានចាត់ទុកសកម្មភាពអាមេរិក ជាការរំលោភធម្មនុញ្ញអង្គការសហប្រជាជាតិ និងច្បាប់អន្តរជាតិ។
នាយករដ្ឋមន្ត្រី អ៊ីស្រាអែល លោកបេនចាមីន ណេតាន់ យ៉ាហ៊ូ បានធ្វើទស្សនកិច្ចទៅកាន់ទីក្រុងវ៉ាស៊ីនតោនកាលពីថ្ងៃចន្ទម្សិលមិញនេះ ព្រមទាំងបានចុះហត្ថលេខាលើសេចក្តីប្រកាសមួយ ជាមួយប្រធានាធិបតី ត្រាំ ដោយបានទទួលស្គាល់តំបន់ហ្គោឡាន់របស់ស៊ីរី ជាទឹកដី អ៊ីស្រាអែល។ប្រទេសបារាំង, អង់គ្លេស និងសម្ព័ន្ធមិត្តដទៃទៀតរបស់អាមេរិក បានអះអាងថា ពួកគេនៅតែពិចារណាចាត់ទុកថា ដែនដីGolan Heights ជាដែនដី ដែលអ៊ីស្រាអែលចូលកាន់កាប់ដោយខុសច្បាប់ ស្របតាមដំណោះស្រាយរបស់អង្គការសហប្រជាជាតិ ។
ដោយឡែក អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ថ្លែងថា ការប្រកាសទទួលស្គាល់របស់លោកដូណាល់ ត្រាំ បែបនេះ បានធ្វើឲ្យទម្រង់ផ្លូវច្បាប់អន្តរជាតិនានា ក្លាយជាអាសារឥតការ គ្មានប្រយោជន៍ ហើយការធ្វើបែបនេះ នាំឲ្យមានរលកនៃស្ថានការតានតឹងថ្មីមួយទៀត នៅក្នុងតំបន់មជ្ឈិមបូព៌ា ។
គួរបញ្ជាក់ដែរថាអ៊ីស្រាអែលបានវាយដណ្តើមយកតំបន់ខ្ពង់រាបហ្គោឡង់ពីប្រទេសស៊ីរីនៅក្នុងសង្គ្រាមបូព៌ាឆ្នាំ ១៩៦៧ និងបានប្រកាសដាក់តំបន់នេះជាទឹកដីរបស់ខ្លួននៅក្នុងឆ្នាំ១៩៨១ ដោយមិនត្រូវបានទទួលស្គាល់ពីអន្តរជាតិនោះឡើយតែមកដល់សម័យលោកដូណាល់ត្រាំជាប្រធានាធិបតីអាមេរិកបានបង្កើតបញ្ហានេះឡើង៕