ក្រុមហ៊ុនស៊ីបៃអូថេកនៅក្រចេះតែដឹកនាំការកាប់បំផ្លាញដើមឈើនៅ ឃុំសៀមបូក ស្រុកសៀមបូក ខេត្តស្ទឹងត្រែង?!
03-April-2024 / ព័ត៌មានជាតិ
ស្ទឹងត្រែង៖សហគមន៍ការពារព្រៃឡង់ខេត្តស្ទឹងត្រែង អះអាងថា ដើមឈើផលិតជ័រទឹករាប់សិបដើមបន្ថែមទៀត ឋិតនៅចំណុចអូរគ្រាក់ នៃឃុំសៀមបូក ស្រុកសៀមបូក ត្រូវក្រុមហ៊ុនស៊ីបាយអូថេក (Ci - Biotech Co ., Ltd) ដឹកនាំការកាប់រំលំធ្វើអាជីវកម្ម និងដឹកជញ្ជូនចូលការដ្ឋានរបស់ក្រុមហ៊ុន ដែលមានទីតាំងឋិតនៅ ឃុំបឹងចារខេត្តក្រចេះឯណោះ។ 
ជាក់ស្តែងដើមឈើផលផលិតជ័រទឹកជាង ៣០ដើម ត្រូវកម្មករក្រុមហ៊ុនស៊ីបាយអូថេកកាប់ ដោយដឹកជញ្ជូនតាមរថយន្តប៉ាកុង ៣គ្រឿង ចេញក្រៅ កាលពីថ្ងៃទី៤ មករា។ ឈ្មោះ សុខ ជា ដែលជាមេការគ្រប់គ្រងរបស់ក្រុមហ៊ុនស៊ីបាយអូថេក គឺជាអ្នកដឹកនាំបញ្ជាកម្មករនិងប្រជាពលរដ្ឋឲ្យចូលកាប់ឈើ អារច្រៀកឈើ ដឹកចេញពីព្រៃឡង់ក្នុងឃុំសៀមបូក ជារៀងរាល់ថ្ងៃ។
រយៈពេលប៉ុន្មានថ្ងៃដើមខែមករា ឆ្នាំ២០១៩នេះ ក្រុមហ៊ុនស៊ីបាយអូថេក ធ្វើសកម្មភាពកាប់រំលំដើមច្បោះជ័រធំៗដឹកចេញពីព្រៃឡង់ក្នុងឃុំសៀមបូក ស្រុកសៀមបូក ខេត្តស្ទឹងត្រែង យ៉ាងគឃ្លើនធ្វើឲ្យប៉ះពាល់យ៉ាងខ្លាំងដល់ការរស់នៅរបស់ប្រជាពលរដ្ឋ ហើយលោក ម៉ុម សារឿន អភិបាលខេត្តស្ទឹងត្រែង និងប្រធានមន្ទីរបរិស្ថានខេត្តស្ទឹងត្រែង បែរជានាំគ្នាសម្ងំស្ងៀមធ្វើមិនដឹងមិនឮ
អ្នកសម្របសម្រួល សហគមន៍ការពារព្រៃឡង់ខេត្តស្ទឹងត្រែង កញ្ញា ឈឿន លី ឲ្យកាសែតដឹង ថា ក្រុមហ៊ុនបានបញ្ជូនគ្រឿងចក្រ និងកម្មករជាច្រើននាក់ កាប់រំលំឈើនៅទីតាំងដែលសំបូររណ្ដៅជ័រទឹករបស់អ្នកស្រុករាប់រយគ្រួសារ។ មេឃុំបឹងចារ លោក ហុល សឿន ឲ្យដឹងថា អាជ្ញាធរឃុំក្រោយពី បានទទួលដំណឹងពីអ្នកភូមិ លោកបានរាយការណ៍ជូនថ្នាក់លើរួចហើយ។ លោកថា ខ្ញុំចង់ដោះស្រាយបញ្ហាកាប់ដើមច្បោះនេះដែរ»។
សូមបញ្ជាក់ថា៖ក្រុមហ៊ុនស៊ីបាយអូថេកក (Ci-Biotech Co., Ltd.) ទួលបានដីសម្បទានសម្រាប់វិនិយោគដំណាំឧស្សាហកម្ម អាកាស្យា ឬស្ថានីយស្ដារព្រៃឈើឡើងវិញ មានទំហ៊ំជាង ៣ម៉ឺនហិកតារ ( ៣៤.០០៧ ) កាលពីខែមិថុនា ឆ្នាំ២០១២ ឋិតនៅក្នុងស្រុកសំបូរ ខេត្តក្រចេះ និងមួយផ្នែកចូលដីស្រុកសៀមបូក ខេត្តស្ទឹងត្រែង។ ក៏ប៉ុន្តែពលរដ្ឋ និង សហគមន៍ព្រៃឡង់ចោទថា ក្រុមហ៊ុននេះ ធ្វើអាជីវកម្មឈើទ្រង់ទ្រាយធំនៅដែនជម្រកសត្វព្រៃឡង់ខុសច្បាប់ និងមានដេប៉ូអារច្រៀកឈើដឹកទៅប្រទេសវៀតណាមផង។
សហគមន៍ព្រៃឡង់ ខេត្តក្រចេះ ឲ្យដឹងថា ដើមឈើផលិតជ័រទឹក ដែលនៅសេសសល់ច្រើនជាងគេ ក្នុងតំបន់ព្រៃឡង់ នៅចំណុចអូរឡង់ និងអូរគ្រាក់ នៃឃុំសៀមបូក ស្រុកសៀមបូក ខេត្តស្ទឹងត្រែង កំពុងប្រឈមការបាត់បង់ជាបន្តបន្ទាប់ ក្រោយពីក្រុមហ៊ុនបញ្ជូនគ្រឿងចក្រ និងរថយន្តប៉ាកុង ចូលតំបន់នោះ។ ក្រុមស្នូលព្រៃឡង់ ខេត្តក្រចេះថ្លែងមិនហ៊ានបញ្ចេញឈ្មោះ សង្កេតឃើញថា ក្រុមហ៊ុន កំពុងដំណើរការអាជីវកម្មឈើ ដែលមានកម្មករក្រុមហ៊ុនរាប់សិបនាក់ សម្រុកចូលអារឈើមូល ជាច្រើនតំបន់ ជាពិសេសនៅកន្លែងដែលសំបូរដើមឈើផលិតជ័រទឹកអ្នកស្រុក។ លោកបារម្ភថា ឈើមូលធំ និងរណ្ដៅជ័រទឹកអ្នកស្រុកនឹងវិនាសមហន្តរាយ ៖ «ក្នុងតំបន់អូរឡង់មានច្បោះច្រើន ជាងអូរជាំ ព្រោះអូរជាំក្រុមហ៊ុនកាប់មួយចំនួនធំហើយ។
សហគមន៍ព្រៃឡង់បារម្ភខ្លាំង ព្រោះអីក្រុមហ៊ុនលាក់បាំង អាជីវកម្ម ហើយអាជ្ញាធរឃុំ ស្រុក និងខេត្តកាន់ជើងក្រុមហ៊ុនអស់ហើយ ដោយគេថា ក្រុមហ៊ុនមានច្បាប់ បើយើងនិយាយអីអត់មានប្រសិទ្ធភាព»។បើតាមសហគមន៍ព្រៃឡង់ខេត្តក្រចេះឲ្យដឹងថាកាលពីទី២៤ ខែឧសភា កន្លងទៅមាន សាឡាងមួយគ្រឿងដែលលិចនៅកំពង់ដរក្នុងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះគឺមកពី បានផ្ទុកឈើមូលប្រហែលជិត២០ម៉ែត្រគូប ជារបស់ក្រុមហ៊ុនស៊ីបាយអូរថេក (Ci-Biotech Co., Ltd.) ដែលគ្រោងដឹកជញ្ជូនទៅលក់នៅប្រទេសវៀតណាម។
ក្រុមហ៊ុនស៊ីបាយអូថេក ឬស្ថានីយស្តារព្រៃឈើឡើងវិញ បានចុះកិច្ចព្រមព្រៀងជាមួយរដ្ឋាភិបាលវិនិយោគ តែព្រៃរិចរឹល តែធាតុពិតក្រុមហ៊ុននេះ វិនិយោគនៅតំបន់ព្រៃស្រោងខុសច្បាប់ ក្នុងឃុំកំពង់ចាម និងឃុំវឌ្ឍនៈ ស្រុកសំបូរ ខេត្តក្រចេះដោយឈូសឆាយព្រៃស្រោង យកឈើមានតម្លៃ និងកាប់បំផ្លាញដើមឈើផលិតជ័រទឹក ជាបន្តបន្ទាប់ តាំងពីឆ្នាំ២០១២ រហួតមកទល់ពេលនេះ៖ «និយាយរួមទៅសម្បទានដូចស្តារព្រៃឈើឡើងវិញ ប៉ុន្តែប្លុកហ្នឹង សុទ្ធដើមឈើធំៗ ព្រៃក្រាស់នៅតំបន់ហ្នឹង ហើយដើមច្បោះរបស់ពលរដ្ឋរាប់ពាន់ដើមនៅក្នុងប្លុករបស់ក្រុមហ៊ុន និងមានឧកញ៉ា ២ ទៅ៣នាក់ ដើម្បីធ្វើភាគហ៊ុន»។
កាលពីឆ្នាំ២០១៦ ពលរដ្ឋរស់នៅឃុំវឌ្ឍនៈ និងឃុំកំពង់ចាម ធ្លាប់បានដាក់ពាក្យប្តឹងក្រុមហ៊ុននេះថា ប្រើគ្រឿងចក្រ ឈូសឆាយយកឈើមានតម្លៃនៅតំបន់ព្រៃឡង់ និងបោះទីតាំងអារច្រៀក និងដេប៉ូអារឈើក្បែរតំបន់ព្រៃឡង់ ដែលមានរថយន្តយីឌុបច្រើនគ្រឿងត្រៀមដឹកចេញក្រៅ ទៅកាន់ប្រទេសវៀតណាម។
លើសពីនេះ សហគមន៍រស់នៅក្បែរតំបន់ព្រៃឡង់ ធ្លាប់ដាក់ពាក្យប្តឹងក្រុមហ៊ុននេះច្រើនសារ ពីបទកាប់បំផ្លាញដើមឈើផលិតជ័រទឹករបស់ពួកគេអស់រាប់ម៉ឺនដើម តែគ្មានដំណោះស្រាយ។
ប្រជាពលរដ្ឋនិយាយថា ប្រសិនបើគ្មានការឃុបឃិតបើកដៃពីសំណាក់មន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនស្ថាប័នទេនោះ គឺគ្មានក្រុមហ៊ុនឬជនល្មើសណាអាចកាប់ឈើដឹកជញ្ជូនចេញពីតំបន់ព្រៃឡង់ នៃឃុំសៀមបូក ស្រុកសៀមបូក យ៉ាងពេញបន្ទុកដូចសព្វថ្ងៃនេះទេ។
ប្រធានមន្ទីរបរិស្ថានខេត្តស្ទឹងត្រែង បានរក្សាភាពស្ងៀមស្ងាត់បណ្ដោយឲ្យព្រៃឡង់ក្នុងឃុំសៀមបូក ត្រូវប្រឈមនឹងសេចក្ដីវិនាស ហេតុនេះហើយទើបមានការអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទប់ស្កាត់ជាបន្ទាន់មុនពេលព្រៃឡង់ក្នុងស្រុកសៀមបូក ត្រូវវិនាសហិនហោចអស់។
