បែកធ្លាយរឿងអភិបាលរងខេត្តពោធិ៍សាត់ លោក ខូយ រីដា ធ្វើខ្នងបង្អែកមេឈ្មួញឈើដុះស្លែ ឧកញ្ញ៉ា តាំង អៀង កាប់បំផ្លាញព្រៃឈើយ៉ាងអនាធិបតេយ្យ ?
27-March-2024 / ព័ត៌មានជាតិ
(ពោធិសាត់)៖ ថ្មីៗនេះយោង សេចកីរាយការណ៍ ពីប្រជាពលរដ្ឋក្នុងស្រុកភ្នំក្រវាញ និងស្រុកវាលវែង បានរាយការណ៍អោយដឹងថា ព្រៃឈើដែលនៅសេសសល់ក្នុងស្រុកទាំង២នេះ ជៀសមិនផុតពីការវិនាសហិនហោចជាក់ជាមិនខាន ដរាបណារាជរដ្ឋាភិបាលនៅតែបន្តអោយ លោក ម៉ៅ ធនិន គ្រប់គ្រងជាអភិបាលខេត្តពោធិ៍សាត់បន្តទៀតដោយ បើកដៃអោយលោកអភិបាលរងខេត្ត លោក ខូយ រីដា ជាអ្នកកាងបទល្មើស ជាអ្នករកចំណូលអោយលោកអភិបាលខេត្ត ដូចបច្ចុប្បន្ន។
បើយោងតាមប្រភពព័ត៌មានពីប្រជាពលរដ្ឋបានអោយដឹងថា សព្វថ្ងៃនេះ ក្នុងខេត្តពោធិសាត់ បទល្មើសគ្រប់បែបយ៉ាងកើតឡើងឥតឈប់ឈរ ដោយសារលោក ខូយ រីដា ជាខ្នងបង្អែកគ្រប់បែបយ៉ាង ក៏ដូចជាប្រធានមន្ទីរពាក់ព័ន្ធក្នុងខេត្តពោធិ៍សាត់គ្មានឆន្ទៈក្នុងការបង្ក្រាបទប់ស្កាត់បទល្មើសព្រៃឈើឲ្យស្របតាមបទបញ្ជាលេខ០០២របស់រាជរដ្ឋាភិបាលនោះ ឬក៏បង្ក្រាបអាតូចទុកអាធំឲ្យរស់ចិញ្ចឹមឆ្នាំងបាយរបស់ខ្លួននិងបក្ខពួក។
តាមសេចក្តីរាយការណ៍ថ្មីៗបានឲ្យដឹងថា ប៉ុន្មានថ្ងៃនេះគេឃើញមានកម្លាំងសមត្ថកិច្ចកងរាជអាវុធហត្ថលើផ្ទៃប្រទេសចុះទៅបង្ក្រាបទីតាំងស្តុឈើនិងរថយន្ត ដឹកឈើ ចំនួន០២គ្រឿង ប្រមូលឈើបាន ជាច្រើនកំណាត់និងឃាត់ខ្លួនមនុស្ស០៤នាក់ ដោយចោទប្រកាន់ថាដឹកឈើគ្មាន ការអនុញាតនៅក្នុងភូមិសាស្ត្រស្រុក ភ្នំក្រវាញ ហើយយកទៅប្រគល់ឲ្យរដ្ឋបាលព្រៃឈើស្រុកភ្នំក្រវាញចាត់ការតាមនីតិវិធី ប៉ុន្តែក្រោយពីឲ្យឈើចេញទៅបាត់ទើបដោះលែងមនុស្ស០៤នាក់ដែលជាកម្មករស៊ីឈ្នួលដឹកឈើឲ្យមេការឈ្មោះ លីម ត្រូវជាកូនរបស់ឧកញ៉ា លាង ចាន់មុនី ដែលទំនងជាពុំសូវមានឥទ្ធិពលខ្លាំងដូចមេឈ្មួញធំ តាំង អៀង ដែលល្បីថាបានទិញព្រៃឈើផ្តាច់មុ ខនៅក្នុងតំបន់ទាំងអស់នោះដែលពាក្យស្លោកតែងពោលថា ភ្នំមួយមិនអាចមានខ្លាពីរ ដែលត្រូវបានគេមើលឃើញថា ពាលស៊ីពាលវាបែបនេះផងដែរ?។
ចំណែកឯមេឈ្មួញតាំង អៀង វិញដែលកំពុងយកច្បាប់ពីក្រហែងមេឃមកគម្រាមហាជននិងសមត្ថកិច្ចដោយប្រើអាជ្ញាប័ណ្ណក្រុមហ៊ុនអឹមឌីអេស(MDS) របស់លោកឧកញ្ញ៉ា ទ្រី ភាព ធ្វើជាដើមទុនរក ស៊ីឈើយ៉ាងពេញទំហឹងនៅក្នុងទឹកដីខេត្តពោធិសាត់ទាំងមូលដែលអាជ្ញាប័នឧញ្ញាទ្រីភាពបានអស់សុពលភាពតាំងពីជាង១០ឆ្នាំមុនមកម្លេះ។ បញ្ហានេះត្រូវបានមហាជនអ្នកស្រុកមើលឃើញថា លោកម៉ៅ ធនិន្តបានឃុបឃិតជាមួយមន្ត្រីជុំនាញយកអាជ្ញាប័ណ្ណឧកញ្ញ៉ាទ្រីភាពក្លែងខ្លាយមកធ្វើជាខែល ចំណែកសមត្ថកិច្ចជំនាញ ចាប់ បានតែអ្នករកស៊ីតូចតាចប៉ុណ្ណោះ ដើម្បីធ្វើរបាយការណ៍អោយថ្នាក់លើយកស្នាដៃ ពោលគឺពួកគេទុកឲ្យមេឈ្មួញឈើធំ តាំង អៀង សម្រាប់ចិញ្ចឹមឆ្នាំងបាយដែលជាប្រភពចំណូលសេដ្ឋកិច្ចយ៉ាងសំខាន់របស់សមត្ថកិច្ចនិងមន្ត្រីជំនាញទាំងអស់ក្នុងខេត្តពិសេសលោកអភិបាលខេត្តពោធិ៍សាត់ តែម្ដង។
ប្រភពច្បាស់ការណ៍នេះបានឲ្យដឹងថា មេឈ្មួញ ទុច្ចរិត តាំង អៀង កំពុងកាប់បំផ្លាញព្រៃឈើនៅក្នុងតំបន់ដែនជម្រកសត្វព្រៃភ្នំសំកុស តំបន់អភិរក្សជួរភ្នំក្រវាញភាគកណ្ដាល និងតំបន់ដែនជម្រកសត្វព្រៃភ្នំឱរ៉ាល់ដែលអាចធ្វើឲ្យប្រឈមនឹងសេចក្ដីវិនាសហិនហោចជាបន្តបន្ទាប់ជៀសមិនផុតឡើយ។ ហើយមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័នមិនចាត់វិធានការបង្ក្រាបព្រោះជាប្រភពចំណូលដ៏សំខាន់របស់ពួកគេ។ ប្រភពបែកធ្លាយពីមន្ត្រីនិយាយថា មេឈ្មួញ តាំ ង អៀង អាចបន្តសកម្មភាពកាប់ឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ បានយ៉ាងរលូនបែបនេះ គឺមានការឃុបឃឹតបើកដៃពីសំណាក់ លោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងលោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ផង ដែរ ដោយគ្មានច្បាប់អនុញ្ញាតអ្វីទាំងអស់ទើបមេឈ្មួញ តាំង អៀង យកអឹមឌីអេសមកកម្រាមហាជននិងសមត្ថកិច្ចប៉ុណ្ណោះ។
គួរកត់សំគាល់ថាលោក ម៉ៅ ធនិន អភិបាលខេត្តពោធិ៍សាសាត់ ក៏ដូចជាលោក វេង សាខុន រដ្ឋម ន្ត្រីក្រសួងកសិកម្ម និងលោក សាយ សំអាល់ រដ្ឋមន្ត្រីក្រសួងបរិស្ថាន កំពុងអង្គុយបក់ផ្សែងរក្សាភាពស្ងៀមស្ងាត់ បណ្ដោយឲ្យមេឈ្មួញតាំង អៀងធ្វើអ្វីៗបានស្រេចតែអំពើចិត្តលើសកម្មភាពដឹកជញ្ជូនឈើយ៉ាងពេញបន្ទុកនៅក្នុងស្រុកវាលវែងនិងស្រុកភ្នំក្រវាញក្រោមក្រសែភ្នែកលោក កែវ អូម៉ាលីស្ស ប្រធានរដ្ឋបាលព្រៃឈើធ្វើមិនដឹងមិនឮអ្វីទាំងអស់។
ប្រជាពលរដ្ឋរស់នៅតំបន់នោះកំពុងមានការព្រួយបារម្ភពីការបាត់បង់ព្រៃឈើនៅក្នុងដែនជម្រកសត្វព្រៃភ្នំសំកុស តំបន់អភិរក្សជួរភ្នំក្រវាញភាគកណ្ដាល និងតំបន់ដែនជម្រកសត្វព្រៃភ្នំឱរ៉ាល់ ដោយសារមេឈ្មួញ តាំង អៀង បានយកឈ្មោះក្រុមហ៊ុនអឹមឌីអេស(MDS)របស់លោកឧកញ៉ា ទ្រី ភាព មកប្រើប្រាសបិទបាំង ក្នុងការកាប់បំផ្លាញនិងដឹកជញ្ជូនឈើយ៉ាងសប្បាយរីកថ្លើមនឹងការកើបលុយធ្វើឲ្យព្រៃឈើកាន់តែរងការវិនាសជាបន្តបន្ទាប់។
ប្រភពបន្តឲ្យដឹងថា មេឈ្មួញទុច្ចរិត តាំង អៀង កំពុងជាន់ពន្លិចកិត្តិយសឧកញ៉ា ទ្រី ភាព ម្ចាស់ក្រុមហ៊ុនអឹមឌីអេស(MDS)ដែលបានបញ្ចប់ការរកស៊ីឈើយូរណាស់មកហើយ ពេលនេះទោះបីជាលោក តាំង អៀង ប្រើប្រាស់អាជ្ញាប័ណ្ណរបស់ក្រុមហ៊ុននេះក៏ដោយគឺអាចប្រឈមនឹងការទទួលខុសត្រូវចំពោះមុខច្បាប់ ខណៈដែលACUនិងគណៈកម្មការបង្ក្រាបនិងទប់ស្កាត់បទល្មើសព្រៃឈើថ្នាក់ជាតិចុះត្រួតពិនិត្យស៊ើបអង្កេតឲ្យបានស៊ីជម្រៅទៅលើសកម្មភាពមេឈ្មួញ តាំង អៀង ដែលកំពុងធ្វើសកម្មភាពកាបបំផ្លាញ និងដឹកជញ្ជូនឈើដោយសាការបើដៃពីអាជ្ញាធរខេត្តនិងពីមន្ត្រីជំនាញពាក់ព័ន្ធដោយគ្មានការអនុញាតដើម្បីចាត់ការតាមផ្លូវច្បាប់។
ពាក់ព័ន្ធនឹងករណីមេឈ្មួញទុច្ចរិត តាំង អៀង កំពុងសម្រុកកាប់ និងដឹកជញ្ជូនឈើនៅក្នុងភូមិសាស្ត្រខាងលើនេះ ដែលអាចជាប់ពាក់ព័ន្ធជាមួយមន្ត្រីជំនាញ និងសមត្ថកិច្ចដូចសម្លកំពឹសក្នុងខេត្តពោធិសាត់ អង្គភាពយើងខ្ញុំមិនអាចធ្វើការទំនាក់ទំនងសុំការបំភ្លឺពីភាគីណាមួយបានទេ ទោះជាយ៉ាងណាក្តីអង្គភាពយើងនឹងរង់ចាំទទួលការបកស្រាយបំភ្លឺពីអាជ្ញាខេត្ត និងពីមន្ត្រីជំនាញពាក់ព័ន្ធរៀងរាល់ម៉ោងធ្វើការ៕
