មន្ដ្រីជំនាញនិងអាជ្ញាធរកំពុងតាមដានដំណើររបស់ដំរីព្រៃមួយហ្វូងដែលចូលភូមិអ្នកស្រុកនៅព្រះវិហ៊ារ

ខេត្តព្រះវិហារ៖បន្ទាប់ពីប្រជាពលរដ្ឋប្រទះឃើញហ្វូងដំរីព្រៃ ចូលមកក្បែរភូមិអ្នកស្រុកក្នុងខេត្តព្រះវិហារ ក្រុមការងារមន្ទីរបរិស្ថានខេត្តព្រះវិហារ សហការជាមួយបុគ្គលិកជំនាញមកពីអង្គការ WCS និងរដ្ឋបាលស្រុកត្បែងមានជ័យ ចាប់តាំងពីថ្ងៃទី១២ ខែសីហា ឆ្នាំ២០២៦រហូតមកដល់ពេលនេះ បាននិងកំពុងតាមដានដំណើរ និងការស្នាក់នៅរបស់ដំរីព្រៃមួយហ្វូងសរុបចំនួន៦ក្បាល នៅក្នុងនោះមានកូនតូចចំនួន១ក្បាល។ហ្វូងដំរីព្រៃបានរត់ចេញពីតំបន់ព្រៃព្រះរកា ចូលក្នុងភូមិឋានរបស់ពលរដ្ឋ បំផ្លាញទ្រព្យសម្បត្តិ ផលដំណាំ និង ជាន់មនុស្សរបួសចំនួន ២ នាក់ នៅចំណុចភូមិពោធិ៍ខៀន ឃុំពោធិ ស្រុកត្បែងមានជ័យ ខេត្តព្រះវិហារ។

ពួកវាបានដើរចូលមកក្បែរនៅចំណុចព្រៃកែង ស្រោងស្រឡៅ នៅដែនជម្រកសត្វព្រៃឆែប-ព្រះរកា ក្នុងស្រុកត្បែងមានជ័យ ខេត្តព្រះវិហារ។ ក្រុមការងារបានចុះអង្កេតឃ្លាំមើលជាក់ស្តែង និងប្រើប្រាស់បច្ចេកវិទ្យាដ្រូនដើម្បីត្រួតពិនិត្យ រកឃើញហ្វូងសត្វដំរីស្ថិតនៅចម្ងាយប្រហែល៣គីឡីម៉ែត្រពីភូមិប្រជាពលរដ្ឋ។ ហ្វូងដំរីខាងលើបានធ្វើដំណើរនិងរស់នៅដោយមិនបង្កបញ្ហាអ្វីជាមួយមនុស្សទេនៅចំណុចអូរស្រោងស្រឡៅ ដែលអាចជាកន្លែងស្នាក់នៅរបស់ពួកវាតែម្តង។

តាមការបញ្ជាក់របស់ក្រសួងបរិស្ថាន កន្លងមកមានសេចក្តីរាយការណ៍ពីប្រជាពលរដ្ឋអំពីការព្រួយបារម្ភ និងការប៉ះពាល់ដំណាំនៅតំបន់នោះមួយចំនួន ប៉ុន្តែក្រុមការងារបាននិងកំពុងពិនិត្យតាមដានយ៉ាងយកចិត្តទុកដាក់ ព្រមទាំងបានចុះអប់រំដល់ប្រជាពលរដ្ឋនៅជុំវិញតំបន់ក្បែរនោះឱ្យមានចំណេះដឹង ចូលរួមការពារ និងអភិរក្ស ជៀសវាងការបរបាញ់ មានជម្លោះជាមួយសត្វដំរីព្រៃឬដំរីអាស៊ី ដែលជាប្រភេទសត្វកម្រជិតផុតពូជ និងធានាការរស់នៅរបស់ដំរីព្រៃត្រឡប់ចូលព្រៃវិញ។

សូមបញ្ជាក់ថា តាមការសិក្សាស្រាវជ្រាវ សត្វដំរីព្រៃនៅដែនជម្រកសត្វព្រៃឆែប-ព្រះរកា មានចន្លោះពី១៥ក្បាលទៅ២០ក្បាល ដែលត្រូវបានយកចិត្តទុកដាក់និងអភិរក្សខ្លាំងបំផុត។ ដំរីអាស៊ីជាប្រភេទសត្វដែលជិតផុតពូជនៅលើពិភពលោក តែនៅបន្តមានវត្តមាននៅក្នុងប្រទេសកម្ពុជា។ យោងតាមទិន្នន័យពីការស្រាវជ្រាវរបស់មន្រ្តីជំនាញ ក្រសួងបរិស្ថាននិងដៃគូពាក់ព័ន្ធនៅក្នុងតំបន់ការពារធម្មជាតិនានា បានរកឃើញថា ដំរីអាស៊ីឬដំរីព្រៃបានរស់នៅជាហ្វូង ហើយមានឃើញកូនតូចៗជាច្រើនថែមទៀត ដែលមានប្រមាណចន្លោះពី៤០០ទៅ៦០០ក្បាល។ ការបង្ហាញវត្តមានហ្វូងដំរីជាបន្តបន្ទាប់ គឺជាក្តីសង្ឃឹមរបស់ក្រុមអ្នកអភិរក្សបរិស្ថានដែលបានបង្ហាញពីប្រសិទ្ធភាពនៃការការពារ និងអភិរក្សព្រៃឈើ ទីជម្រកសត្វដំរី និងការថែរក្សាបាននូវប្រភេទពូជដំរី ដែលជិតផុតពូជនៅលើពិភពលោក ក៏ដូចជាជួយថែរក្សាលំនឹងបរិស្ថាន និងការពារកេរដំណែលធម្មជាតិ៕