លោក អ៊ឹង វីរៈចៅជីបម៉ុង រៀបការនៅបរទេសប្រមូលយកចំណងដៃជិត ២០ ម៉ឺនដុល្លារ បរិច្ចាគដល់អង្គការមូលនិធិកុមារកម្ពុជា

ភ្នំពេញ៖កាលពីដើមខែ មិថុនា អគ្គនាយកក្រមហ៊ុនជីបម៉ុងបន្តវេនវ័យក្មេង លោក អ៊ឹង វីរៈ បានរៀបមង្គលការបែបបរទេសចំនួន ៤ ថ្ងៃ នៅឯប្រទេសបារាំងជាមួយបុត្រីលោកឧបនាយករដ្ឋមន្ត្រីស៊ុនចាន់ថុល។ កម្មវិធីរបស់លោកបានរៀបចំការជួបជុំផ្សេងៗគ្នា មានទាំងការបំពាក់ចិញ្ចៀនរៀបការ ការជប់លៀងលក្ខណៈគ្រួសារ មិត្តភក្តិ និង ជប់លៀងលើទូកប្រណីតផងដែរ។​ 

ឮ ក្រោយរៀបការមិនទាន់បានមួយខែផង លោក អ៊ឹង វីរៈ និង​ ភរិយា ស៊ុន សីមូនី បានធ្វើរឿងអស្ចារ្យមួយសម្រាប់កុមារកម្ពុជា ដោយយកចំណាងដៃអាពាហ៍ពិពាហ៍ជាមួយទឹកប្រាក់ដល់ទៅជិតម្ភៃម៉ឺនដុល្លារ បរិច្ចាគជូនដល់អង្គការមូលនិធិកុមារកម្ពុជា។

លោក អ៊ឹង វីរៈ បានសរសេរបង្ហោះនៅលើទំព័រហ្វេសប៊ុករបស់ខ្លួនយ៉ាងដូច្នេះថា៖ «ថ្ងៃទី ២៤ មិថុនា ឆ្នាំ ២០២៦ ពួកយើងពិតជាមានក្តីសោមនស្សរីករាយ ដែលយើងមានឱកាសបាននាំយកចំណងដៃអាពាហ៍ពិពាហ៍របស់យើង ចំនួន ១៦០ ៨៨៨ ដុល្លារអាមេរិក មកបរិច្ចាគជូនដល់អង្គការមូលនិធិកុមារកម្ពុជា។ មូលនិធិនេះទទួលបានពីទឹកចិត្តសប្បុរស និង ការគាំទ្រយ៉ាងកក់ក្តៅពីក្រុមគ្រួសារ សាច់ញាតិ និង មិត្តភក្តិទាំងអស់ ដែលបានចូលរួមអបអរសាទរពិធីមង្គលការរបស់ពួកយើង។

ពួកយើងមានសេចក្តីសោមនស្ស ដែលបានចូលរួមចំណែកគាំទ្របេសកកម្មរបស់ អង្គការមូលនិធិកុមារកម្ពុជា ក្នុងការលើកស្ទួយផ្នែកអប់រំ សេវាថែទាំសុខភាព និង ការអភិវឌ្ឍសហគមន៍ សម្រាប់កុមារ និង គ្រួសារនៅតំបន់ស្ទឹងមានជ័យ ជាពិសេស តាមរយៈ The Rice Academy និង CCF Medical Clinic។

ក្នុងការចាប់ផ្តើមដំណើរជីវិតថ្មីជាគូស្វាមីភរិយា ពួកយើងជឿជាក់ថា ការរៀបចំកម្មវិធីដ៏មានអត្ថន័យនេះ នឹងអាចបន្សល់ទុកនូវផលវិជ្ជមានដល់សង្គម។ ពួកយើងសង្ឃឹមថា ការរួមចំណែកនេះ នឹងជួយបង្កើតឱកាសថ្មីៗ លើកទឹកចិត្តដល់យុវជនជំនាន់ក្រោយ និង កសាងក្តីសង្ឃឹមដ៏រឹងមាំសម្រាប់អនាគតរបស់កម្ពុជា។សូមអរគុណដល់អ្នកទាំងអស់គ្នា ដែលបានប្រែក្លាយថ្ងៃដ៏ពិសេសរបស់ពួកយើង ទៅជាការផ្តល់ក្តីសង្ឃឹម និង ការវិនិយោគដ៏មានអត្ថន័យសម្រាប់អនាគតរបស់កុមារកម្ពុជា»៕