ឧត្តមសេនីយ៍ចៅភិរិទ្ធត្រូវបានដកចេញពីតំណែងជាអគ្គនាយកបច្ចេកទេសក្រសួងការពារជាតិ

ភ្នំពេញ៖សម្តេចតេជោ ហ៊ុន សែន ប្រមុខរដ្ឋស្តីទី បានចេញព្រះរាជក្រឹត្យតែងតាំងឧត្តមសេនីយ៍ឯក ចៅ ភិរិទ្ធ ជាអនុរដ្ឋលេខាធិការក្រសួងការពារជាតិ។  ព្រះរាជក្រឹត្យចេញដោយប្រមុខរដ្ឋស្តីទីចុះថ្ងៃទី១០ ខែមីនា ឆ្នាំ២០២៦ តាមសំណើរនាយករដ្ឋមន្ត្រីបានបញ្ជាក់ថា តែងតាំងមុខតំណែងឧត្តមសេនីយ៍ឯក ចៅ ភិរិទ្ធ អត្តលេខ ០១៣៩២០ នាយទាហាន នៃកងយោធពលខេមរភូមិន្ទ ជាអនុរដ្ឋលេខាធិការក្រសួងការពារជាតិ។ 

សូមបញ្ជាក់ថាលោកឧត្តមសេនីយ៍ឯកចៅភិរិទ្ធដែលបានចូលកាន់តំណែងអគ្គនាយកបច្ចេកទេសក្រសួងការពារជាតិបន្តពីលោកឪពុកគឺលោកនាយឧត្តមសេនីយ៍ចៅភិរុណ!។មិនទាន់ដឹងថាតើឧត្តមសេនីយ៍រូបណានឹងមកកាន់កន្លែងខ្លឹមមួយនេះទេ?

សូមបញ្ជាក់ថាកាលពីអំឡុងពាក់កណ្ដាលឆ្នាំ២០២៤ កន្លងទៅ ឧត្តមសេនីយ៍ឯក ចៅ ភិរិទ្ធ អត្តលេខ ០១៣៩២០ នាយទាហាន នៃកងយោធពលខេមរភូមិន្ទ ទទួលបានការត្រាស់បង្គាប់តែងតាំងមុខតំណែងជា អគ្គនាយក អគ្គនាយកដ្ឋានសម្ភារៈបច្ចេកទេស ក្រសួងការពារជាតិ (ជំនួសមុខតំណែងរបស់ឪពុក) ដំណាលគ្នាជាមួយឪពុក (នាយឧត្តមសេនីយ៍ ចៅ ភិរុណ) ដែលទទួលបានការត្រាស់បង្គាប់តែងតាំងមុខតំណែងជា រដ្ឋលេខាធិការ ក្រសួងការពារជាតិ ដោយព្រះរាជក្រឹត្យលេខ នស/រកត/០៦២៤/៧១៤ ចុះថ្ងៃទី២៦ ខែមិថុនា ឆ្នាំ២០២៤ ។

អនុលោមតាមស្មារតី នៃព្រះរាជក្រឹត្យលេខ នស/រកត/០៦២៤/៧១៤ ចុះថ្ងៃទី២៦ ខែមិថុនា ឆ្នាំ២០២៤ និងព្រះរាជក្រឹត្យលេខ នស/រកត/០៣២៦/៣៣១ ចុះថ្ងៃទី១០ ខែមីនា ឆ្នាំ២០២៦ គឺបង្ហាញឱ្យឃើញថា នាយឧត្តមសេនីយ៍ ចៅ ភិរុណ អត្តលេខ ០០០០៧៥ រដ្ឋលេខាធិការ និងឯកឧត្តម ឧត្តមសេនីយ៍ឯក ចៅ ភិរិទ្ធ អត្តលេខ ០១៣៩២០ អនុរដ្ឋលេខាធិការ ត្រូវជា «ឪពុក-កូន» បានមូលជុំគ្នា» នៅក្រសួងការពារជាតិ ៕